مودی دہلی میں فالس فلیگ کروا کر رو رہا ہے اور ادھر اپنی پراکسیز افغان طالبان اور فتنہ الخوارج کے زریعے پہلے وانا کیڈٹ کالج اور آج اسلام آباد پر دہشت گردانہ حملہ کروایا
تفصیلات کے مطابق اسلام آباد کے حساس علاقے جی الیون میں واقع ضلع کچہری کے باہر منگل کی دوپہر تقریباً ساڑھے بارہ بجے ایک زوردار دھماکہ ہوا، جس میں ابتدائی اطلاعات کے مطابق 12 افراد شہید اور متعدد زخمی ہوگئے۔ ذرائع کے مطابق دھماکے کی جگہ سے خودکش حملہ آور کا سر بھی برآمد ہوا، جس سے یہ ممکنہ طور پر خودکش حملہ معلوم ہوتا ہے۔
ابتدائی رپورٹ کے مطابق دھماکہ کچہری کے پارکنگ ایریا میں کھڑی گاڑی یا خودکش بم سے ہوا۔ دھماکے کی شدت اتنی زیادہ تھی کہ اس کی آواز دور دور تک سنائی دی اور پارکنگ ایریا میں موجود افراد میں خوف و ہراس پھیل گیا۔ دھماکے کے باعث آگ بھڑک اٹھی اور قریبی گاڑیاں بھی آگ کی لپیٹ میں آ گئیں۔
زخمیوں میں وکلاء اور سائلین شامل ہیں اور ریسکیو ذرائع کے مطابق بعض کی حالت تشویشناک ہے۔ فوری طور پر پولیس اور ریسکیو ٹیمیں موقع پر پہنچ گئیں اور زخمیوں کو قریبی اسپتال منتقل کیا گیا۔ دھماکے کے بعد علاقے کو سیل کر دیا گیا اور مزید حفاظتی اقدامات اٹھائے گئے ہیں۔
ذرائع کے مطابق دھماکے کی آواز پولیس لائنز ہیڈکوارٹر تک سنائی دی، جس کے بعد حکام میں ہنگامی الرٹ جاری کر دیا گیا۔ عوام سے کہا گیا ہے کہ وہ کچہری ایریا کے قریب نہ جائیں تاکہ ریسکیو اور پولیس کی کارروائی میں رکاوٹ نہ آئے۔
حکام کا کہنا ہے کہ دھماکے کی نوعیت اور وجوہات کا فوری طور پر جائزہ لیا جا رہا ہے۔تاہم تحقیقات جاری ہیں تاکہ کسی بھی قسم کی جان بوجھ کر کی گئی کارروائی یا دہشت گردانہ حملے کے امکان کا تعین کیا جا سکے۔
یہ دھماکہ اسلام آباد کے حساس علاقے میں ہونے کی وجہ سے قومی سطح پر ہنگامی اہمیت اختیار کر گیا ہے، اور حکام اس کے تمام ممکنہ پہلوؤں کی چھان بین کر رہے ہیں تاکہ حملے کے پیچھے ملوث عناصر اور وجوہات کا مکمل تعین کیا جا سکے۔
