دبئی: دبئی انٹرنیشنل ائیرپورٹ نے رواں سال کے ابتدائی نو ماہ کے دوران 32 لاکھ پاکستانی مسافروں کو خوش آمدید کہا ہے، جو مسافروں کی تعداد میں ایک قابل ذکر اضافہ ہے۔
ائیرپورٹ حکام کے مطابق پاکستانی مسافر دبئی کا چوتھا سب سے بڑا صارف گروپ ہیں اور یہ لوگ سیاحت، کاروبار، خاندانی ملاقاتیں، ملازمت یا یورپ، مشرقِ وسطیٰ اور امریکا کے لیے ٹرانزٹ کے طور پر دبئی کا رخ کرتے ہیں۔
دبئی ائیرپورٹ کے اعداد و شمار کے مطابق جولائی سے ستمبر کے درمیان 2 کروڑ 42 لاکھ مسافروں نے ائیرپورٹ استعمال کیا، جو گزشتہ سال کے اسی عرصے کے مقابلے میں 1.9 فیصد زیادہ ہے۔
اسی طرح جنوری سے ستمبر تک 7 کروڑ 1 لاکھ مسافروں کی آمدورفت ہوئی جو پچھلے سال کے مقابلے میں 2.1 فیصد زیادہ ہے۔ گزشتہ 12 ماہ میں 9 کروڑ 38 لاکھ مسافروں کا نیا ریکارڈ بھی قائم ہوا ہے۔
بین الاقوامی سطح پر دیکھا جائے تو بھارت 88 لاکھ مسافروں کے ساتھ پہلے نمبر پر رہا، اس کے بعد سعودی عرب کے 55 لاکھ اور برطانیہ کے 46 لاکھ شہریوں نے دبئی ائیرپورٹ استعمال کیا۔
یہ بھی پڑھیں : ٹی 20 مقابلہ آج: کون کرے گا سب کو حیران، سری لنکا یا زمبابوے؟
ائیرپورٹ حکام کے مطابق روانہ ہونے والے 99.6 فیصد مسافروں کی امیگریشن صرف 10 منٹ میں مکمل ہوئی، جبکہ دبئی پہنچنے والے 99.8 فیصد مسافروں کی امیگریشن میں صرف 15 منٹ لگے۔
مزید برآں دبئی ائیرپورٹ کے ٹرمینل ون اور ٹرمینل تھری میں توسیعی کام جاری ہے تاکہ بڑھتے ہوئے مسافروں خصوصاً جنوبی ایشیائی مسافروں کی ضروریات کو بہتر انداز میں پورا کیا جا سکے۔
یہ اعداد و شمار دبئی ائیرپورٹ کی کارکردگی اور عالمی سطح پر مسافروں کی سہولت کے حوالے سے شاندار پیش رفت کو ظاہر کرتے ہیں۔
