خیبر پختونخوا میں سکیورٹی فورسز کی کارروائی، 23 بھارتی سرپرستی یافتہ خارجی ہلاک ہوگئے
تفصیلات کے مطابق خیبر پختونخوا کے ضلع کرم میں سکیورٹی فورسز نے دو مؤثر کارروائیوں کے دوران بھارتی سرپرستی یافتہ خارجی عناصر کو ہلاک کر دیا۔ پاک فوج کے شعبہ تعلقات عامہ (آئی ایس پی آر) نے اس بات کی تصدیق کی ہے کہ مجموعی طور پر 23 خوارج اس دوران مارے گئے۔
آئی ایس پی آر کے مطابق، پہلی کارروائی خفیہ اطلاعات کی بنیاد پر کرم میں کی گئی، جس میں ٹارگٹڈ آپریشن کے دوران فائرنگ کے تبادلے میں 12 خوارج ہلاک ہوئے۔ دوسری کارروائی میں ایک اور گروہ کے 11 دہشت گرد مارے گئے، جو بھارتی پراکسی فتنہ الخوارج کے تحت دہشت گردی میں ملوث تھے۔
ترجمان پاک فوج نے کہا کہ ہلاک شدہ عناصر بھارتی سرپرستی میں دہشت گرد سرگرمیوں میں ملوث تھے، اور علاقے میں مزید دہشت گردوں کی تلاش کے لیے سینیٹائزیشن آپریشن جاری ہے۔
آئی ایس پی آر کے مطابق دہشت گردی کے خاتمے کے لیے آپریشن پوری شدت اور رفتار کے ساتھ جاری رہے گا، اور سکیورٹی فورسز دہشت گردی کے مکمل خاتمے کے لیے پرعزم ہیں۔
یہ کارروائیاں پاک فوج کی جانب سے عوام اور ملک کی سکیورٹی کو یقینی بنانے کے لیے جاری مربوط کوششوں کا حصہ ہیں، جس کا مقصد علاقے میں دہشت گردی کے تمام عناصر کو ختم کرنا ہے۔
