انٹر نیشنل کرکٹ کونسل (آئی سی سی) نے مینز ٹی ٹوئنٹی ورلڈ کپ کا شیڈول جاری کر دیا جس کے مطابق میگا ایونٹ کا آغاز 7 فروری سے ہو گا۔
پاکستان اور بھارت کی ٹیمیں 2026 کے ٹی 20 ورلڈ کپ میں 15 فروری کو کولمبو میں آمنے سامنے ہوں گی، 2025 کے ایشیا کپ کے بعد دونوں ٹیموں کا یہ پہلا مقابہ ہوگا، یہ میچ آر پریما داسا اسٹیڈیم میں کھیلا جائے گا۔
امریکا، نیدرلینڈز اور نمیبیا کے ساتھ بھارت اور پاکستان کو ایک ہی گروپ میں رکھا گیا ہے۔ بھارت اپنے گروپ میچ میں 7 فروری کو ممبئی میں امریکا کیخلاف کھیلے گا، 12 فروری کو نئی دہلی میں نمیبیا سے میچ ہوگا۔
شیڈول کے مطابق ٹورنامنٹ کے گروپ مرحلے میں روزانہ 3 میچز کھیلے جائیں گے۔
7 فروری سے 8 مارچ تک جاری رہنے والے ورلڈ کپ کی بھارت اور سری لنکا مشترکہ طور پر میزبانی کررہے ہیں، پاکستان اپنے تمام میچ کولمبو یا کینڈی میں کھیلے گا۔
آئی سی سی نے بی سی سی آئی کو آگاہ کیا ہے کہ اگر سری لنکا سیمی فائنل کے لیے کوالیفائی کرتا ہے تو یہ میچ کولمبو میں کھیلا جائے گا، اسی طرح اگر پاکستان فائنل تک پہنچتا ہے تو فائنل مقابلہ غیر جانبدار مقام پر ہوگا۔
یہ بھی پڑھیں : جنوبی افریقہ کے کھلاڑی نے بھارت کے خلاف میچ میں 51سالہ پرانا ریکارڈ توڑ دیا
جنوبی افریقا فاسٹ بولر مارکو جینسن نے بھارت کے خلاف دوسرے ٹیسٹ میچ میں تاریخ رقم کردی۔
گوہاٹی ٹیسٹ میچ میں مارکو جینسن نے ایک ہی ٹیسٹ میچ میں نصف سنچری اور 6 وکٹیں حاصل کرکے نئی تاریخ رقم کردی۔
25 سالہ آل راؤنڈر نے اتوار کو شاندار بیٹنگ کی اور 91 گیندوں پر 93 رنز بناکر آؤٹ ہوئے۔ انہوں نے پہلی اننگز کے دوران تباہ کن بولنگ کرتے ہوئے 19.5 اوورز میں 48 رنز دے کر 6 کھلاڑیوں کو بھی پویلین کی راہ دکھائی۔
جانسن نے پہلے سیشن میں دھرو جوریل کو آؤٹ کیا اس کے بعد رشبھ پنت، نتیش کمار ریڈی، رویندرا جڈیجا کی بھی وکٹیں حاصل کیں۔
انہوں نے کلدیپ یادیو کو پویلین بھیج کر اپنا پانچواں شکار بنایا، ان کا چھٹا شکار جسپریت بمراہ بنے جو دنیا کے نمبر ون ٹیسٹ بولر ہیں۔
اس سے قبل صرف ایک جنوبی افریقی کرکٹر نے یہ کارنامہ انجام دیا تھا، نکی بوجے نے مارچ 2000 میں بنگلورو کے میدان میں بھارت کے خلاف ٹیسٹ میں نصف سنچری اور پانچ وکٹیں حاصل کی تھیں۔
نمبر تین پر بیٹنگ کرتے ہوئے بوجے نے پہلی اننگز میں 85 اور دوسری اننگز میں 38 اوورز میں 83 رنز کے عوض پانچ وکٹیں حاصل کیں۔
مارکو جانسن نے مجموعی طور پر چھ چوکے اور سات چھکے لگائے انہوں نے لیجنڈری بیٹر سر ویوین رچرڈز کو بھی پیچھے چھوڑ دیا ہے اور وہ ہندوستان میں ایک ٹیسٹ اننگز میں سب سے زیادہ چھکے لگانے والے بیٹر بن گئے تھے، 1974 سے یہ اعزاز ویوین رچرڈز کے پاس تھا۔
