مینا خان آفریدی کی سربراہی میں خیبرپختونخوا کا نیا لوکل گورنمنٹ کمیشن تشکیل، مقامی حکومت کے معاملات کی نگرانی شروع
تفصیلات کے مطابق خیبرپختونخوا حکومت نے مقامی حکومت کے نظام کو مزید مضبوط بنانے کے لیے نیا لوکل گورنمنٹ کمیشن تشکیل دے دیا ہے۔ محکمہ بلدیات، انتخابات و دیہی ترقی کی جانب سے جاری اعلامیہ کے مطابق وزیر بلدیات مینا خان آفریدی کو کمیشن کا چیئرمین مقرر کر دیا گیا ہے۔ یہ کمیشن مقامی حکومت ایکٹ 2013 کے تحت اپنے فرائض انجام دے گا۔
اعلامیہ کے مطابق کمیشن میں ایم پی اے محمد ادریس اور ایم پی اے احمد کُنڈی ممبران کے طور پر شامل ہیں، جبکہ ٹیکنوکریٹ حفیظ الرحمان اور خاتون ٹیکنوکریٹ عائشہ بانو کو بھی رکن مقرر کیا گیا ہے۔ علاوہ ازیں، سیکرٹری لاء اور سیکرٹری لوکل گورنمنٹ کمیشن کے نمائندے بھی ممبران میں شامل ہوں گے، اور فنانس ڈیپارٹمنٹ کا نمائندہ بھی کمیشن کا حصہ ہوگا۔
ڈائریکٹر جنرل لوکل گورنمنٹ کمیشن کو سیکرٹری مقرر کر دیا گیا ہے، اور کمیشن کو فوری طور پر اپنی ذمہ داریاں سنبھالنے کی ہدایت کی گئی ہے۔ کمیشن کا بنیادی مقصد لوکل گورنمنٹ کے امور اور کارکردگی کی نگرانی کرنا ہے، اور لوکل گورنمنٹ کے اختیارات کی نچلی سطح تک منتقلی کو یقینی بنانا ہے۔
اعلامیہ میں یہ بھی بتایا گیا کہ لوکل گورنمنٹ کمیشن کے سیکرٹریٹ کی معاونت ڈائریکٹوریٹ جنرل ایل جی آر ڈی فراہم کرے گا تاکہ کمیشن اپنے مقاصد کے مطابق مؤثر طریقے سے کام کر سکے۔
وزیر بلدیات مینا خان آفریدی نے کہا کہ حکومت کا وژن لوکل گورنمنٹ کو مضبوط بنانا اور عوامی خدمات کی فراہمی کو نچلی سطح تک پہنچانا ہے۔ ان کا کہنا تھا کہ کمیشن کے ذریعے مقامی سطح پر اختیارات اور وسائل کی منتقلی کو یقینی بنایا جائے گا تاکہ عوامی مسائل کو بروقت حل کیا جا سکے۔
ماہرین کے مطابق، اس اقدام سے نہ صرف مقامی حکومت کی کارکردگی میں بہتری آئے گی بلکہ شفافیت اور عوامی اعتماد بھی بڑھانے میں مدد ملے گی۔
