اسلام آباد: پاکستان کے نوجوان کرکٹ کھلاڑیوں نے ایک مرتبہ پھر بین الاقوامی میدان میں اپنی صلاحیتوں کا مظاہرہ کرنے کے لیے پرواز بھری۔
ایشین چیمپئن پاکستان انڈر 19 کرکٹ ٹیم زمبابوے میں ہونے والی تین ملکی سیریز اور آئی سی سی انڈر 19 ورلڈ کپ میں شرکت کے لیے آج اسلام آباد ایئرپورٹ سے روانہ ہو گئی۔
ٹیم کی قیادت فرحان یوسف کر رہے ہیں، جبکہ مجموعی طور پر 15 کھلاڑی اسکواڈ میں شامل ہیں۔ ان کے ساتھ ٹیم مینجمنٹ بھی سفر کر رہی ہے، تاکہ کھلاڑیوں کو مکمل سپورٹ فراہم کی جا سکے۔
رونمائی موقع پر پاکستان کرکٹ بورڈ کے چیئرمین محسن نقوی نے ہوٹل میں ٹیم سے ملاقات کی۔ انہوں نے کھلاڑیوں اور آفیشلز کو نیک تمناؤں کے ساتھ الوداع کیا اور نوجوان کھلاڑیوں کی حوصلہ افزائی کی۔
محسن نقوی نے کہا کہ پاکستان کرکٹ بورڈ ہمیشہ نوجوان ٹیلنٹ کے ساتھ ہے اور امید ہے کہ اسکواڈ بہترین کارکردگی کا مظاہرہ کرے گا۔
یہ بھی پڑھیں : رواں سال کے بہترین سمارٹ فونز کی فہرست سامنے آگئی
پاکستان انڈر 19 ٹیم اسلام آباد سے براستہ دبئی زمبابوے کے دارالحکومت ہرارے پہنچے گی، جہاں تین ملکی سیریز کے دوران وہ میزبان ٹیم اور دیگر شریک ٹیموں کے خلاف میدان میں اتریں گے۔
اس سیریز کے بعد ٹیم آئی سی سی انڈر 19 ورلڈ کپ میں بھی اپنی قابلیت کا مظاہرہ کرے گی۔
کرکٹ شائقین اور ماہرین توقع کر رہے ہیں کہ پاکستان کے نوجوان کھلاڑی بہترین کھیل پیش کریں گے اور اپنے ملک کے لیے فخر کا باعث بنیں گے۔
