ایبٹ آباد: گلیات کے علاقے کالا باغ کے قریب چھم کے مقام پر شدید برف باری کے دوران پھنس گئی سیاہ رنگ کی فیملیز کی گاڑیوں کو ریسکیو ٹیم نے کامیابی سے نکال لیا۔
اطلاع ملنے کے فوری بعد ریسکیو ٹیم جائے حادثہ پر پہنچی۔ سخت سردی اور سلپری راستوں کے باوجود ٹیم نے اپنی پیشہ ورانہ مہارت کا مظاہرہ کرتے ہوئے برف میں دھنسی گاڑیوں کو محفوظ راستے تک پہنچایا۔
ریسکیو ٹیم کی بروقت کارروائی کے باعث متاثرہ فیملیز کی جان و مال کا تحفظ یقینی بنایا گیا۔ متاثرہ افراد نے ریسکیو عملے کو دعاؤں اور خراج تحسین کے ذریعے شکریہ ادا کیا۔
ضلعی انتظامیہ نے شہریوں کو خبردار کیا ہے کہ پہاڑی علاقوں میں موسم سرما کی پہلی برف باری کے بعد راستے سلپری ہو جاتے ہیں، اس لیے ٹائروں کے ساتھ زنجیروں کا استعمال لازمی ہے اور غیر ضروری سفر سے گریز کیا جائے۔
ریسکیو 1122 کے ترجمان نے کہا کہ شہریوں کی حفاظت ان کی اولین ترجیح ہے اور کسی بھی ہنگامی صورتحال میں فوری مدد کے لیے 1122 پر رابطہ کیا جا سکتا ہے۔
ملک کے بالائی علاقوں میں برفباری سے سردی بڑھ گئی، ملکہ کوہسار میں برفباری نے سیاحوں کی موجیں کرا دیں۔
گلیات کے پہاڑوں نے بھی سفید چادر اوڑھ لی، لواری ٹنل میں ڈیڑھ سے دو فٹ تک برف پڑ چکی، چترال میں 28 انچ اور استور کے کئی علاقوں میں 2 فٹ تک برفباری ریکارڈ کی گئی، چلاس اور اپر دیر کے پہاڑوں پر بھی سفیدی چھا گئی۔
یہ بھی پڑھیں : خیبرپختونخوا میں بارش اور برفباری،پی ڈی ایم اے کا نیا الرٹ جاری
بٹگرام میں برفباری سے رابطہ سڑکیں بند ہوگئیں، آزاد کشمیر کی وادی نیلم میں تیسرے روز بھی برفباری جاری رہی، اڑنگ کیل چیئر لفٹ پر سیاحوں کا رش بڑھ گیا، شدید برفباری کے باعث سیاحتی مقامات کی رابطہ سڑکیں بند ہوگئیں۔
مظفرآباد اور گردونواح میں بوندا باندی ہوئی، بلوچستان میں بھی سردی کی شدید لہر آگئی، زیارت میں کم سے کم درجہ حرارت منفی چار ڈگری ریکارڈ کیا گیا، اسلام آباد اور راولپنڈی میں وقفے وقفے سے بارش ہوئی۔
لاہور میں آسمان پر بادلوں کا بسیرا رہا، یخ بستہ ہواؤں سے سردی کی شدت میں اضافہ ہوگیا۔
