ایران، کولمبیا اور کیوبا نے وینزویلا پر امریکہ کے تازہ فوجی حملے کی شدید مذمت کرتے ہوئے اسے وینزویلا کی قومی خودمختاری اور علاقائی سالمیت کی خلاف ورزی قرار دیا ہے۔
ایرانی وزارت خارجہ نے اس موقع پر عالمی برادری اور اقوام متحدہ کی سلامتی کونسل سے فوری کارروائی کرنے اور ذمہ دار امریکی حکام کو جوابدہ ٹھہرانے کا مطالبہ کیا ہے۔ ایرانی ذرائع نے بتایا کہ ایران اس حملے کو عالمی قوانین کی خلاف ورزی سمجھتا ہے اور وینزویلا کی سیاسی خودمختاری کے لیے کھڑا ہے۔
کولمبیا اور کیوبا نے بھی امریکی کارروائی کی شدید مذمت کرتے ہوئے کہا ہے کہ یہ حملہ خطے میں کشیدگی کو مزید بڑھا سکتا ہے۔ دونوں ممالک نے عالمی برادری سے اپیل کی ہے کہ وہ وینزویلا کی سالمیت اور امن و امان کو تحفظ فراہم کرے۔
یہ صورتحال ایسے وقت میں سامنے آئی ہے جب امریکہ کے صدر ڈونلڈ ٹرمپ نے سوشل میڈیا پر تصدیق کی تھی کہ امریکہ نے وینزویلا اور اس کے صدر نیکولس مادورو کے خلاف بڑے پیمانے پر کارروائی کی ہے۔ ٹرمپ کے مطابق اس کارروائی میں وینزویلا کے صدر اور ان کی اہلیہ کو گرفتار کرکے ملک سے باہر منتقل کیا گیا ہے۔
وینزویلا پر امریکی حملے کے بعد عالمی سطح پر ہنگامہ برپا ہو گیا ہے اور متعدد ممالک نے فوری طور پر اس حملے کی مذمت کی ہے۔ تجزیہ کاروں کے مطابق یہ امریکی اقدام خطے میں سیاسی اور اقتصادی کشیدگی میں مزید اضافہ کرے گا اور بین الاقوامی سطح پر شدید ردعمل سامنے آ سکتا ہے۔
