پشاور: گورنر خیبر پختونخوا فیصل کریم کنڈی نے وزیر اعظم پاکستان شہباز شریف اور صدر آصف علی زرداری کو خط لکھا ہے جس میں انہوں نے اسلام آباد ایئرپورٹ کا نام محترمہ بے نظیر بھٹو کے نام پر رکھنے کی درخواست کی ہے۔
فیصل کریم کنڈی نے اپنے خط میں کہا کہ 2008 میں کیے گئے ایک فیصلے کی بنیاد پر اسلام آباد انٹرنیشنل ایئرپورٹ کا نام بے نظیر بھٹو انٹرنیشنل ایئرپورٹ رکھا جائے۔
انہوں نے کہا کہ 21 جون 2008 کو اس وقت کے وزیر اعظم نے قومی اسمبلی کے فلور پر اپنے خطاب میں اسلام آباد ایئرپورٹ کا نام بے نظیر بھٹو انٹرنیشنل ایئرپورٹ رکھنے کا اعلان کیا تھا۔
“میں آپ کو یاد دلانا چاہتا ہوں کہ اسلام آباد کا پرانا ایئرپورٹ 21 جون 2008 کو اس وقت کے معزز وزیر اعظم پاکستان کے اعلان کے بعد بے نظیر بھٹو انٹرنیشنل ایئرپورٹ اسلام آباد قرار دیا گیا تھا۔ (نوٹیفکیشن کی کاپی ساتھ منسلک ہے)۔ محترمہ بے نظیر بھٹو کی 2007 میں شہادت کے بعد یہ فیصلہ کیا گیا تھا۔”
9 اگست 2008 کو سول ایوی ایشن اتھارٹی (سی اے اے) نے اس فیصلے پر عمل درآمد کے لیے باضابطہ نوٹیفکیشن جاری کیا تھا۔ خط میں کہا گیا ہے کہ کئی ممالک بشمول پاکستان، اپنے قومی ہیروز کے نام پر ایئرپورٹس کا نام رکھتے ہیں۔
اس وقت کے وزیر اعظم کا یہ اقدام محترمہ بے نظیر بھٹو کو خراج تحسین پیش کرنے کے لیے تھا، جنہوں نے ملک اور قوم کے لیے اپنی جان قربان کی۔
“جیسا کہ پاکستان میں اور دنیا بھر میں کئی دیگر مثالیں موجود ہیں کہ ایئرپورٹس کا نام قومی شخصیات کے نام پر رکھا گیا ہے تاکہ ان کی خدمات کو تسلیم کیا جا سکے۔ مثال کے طور پر باچا خان ایئرپورٹ پشاور، جناح انٹرنیشنل ایئرپورٹ کراچی، علامہ اقبال انٹرنیشنل ایئرپورٹ لاہور، بیگم نصرت بھٹو انٹرنیشنل ایئرپورٹ سکھر، شیخ زاید انٹرنیشنل ایئرپورٹ رحیم یار خان، اندرا گاندھی انٹرنیشنل ایئرپورٹ دہلی، اور راجیو گاندھی انٹرنیشنل ایئرپورٹ حیدرآباد (بھارت) وغیرہ،” خط کا متن۔
خط میں مزید کہا گیا کہ اسلام آباد ایئرپورٹ کا نام تبدیل کرنا صرف ایک سیاسی فیصلہ نہیں بلکہ عوامی مفاد میں ہے۔ یہ محترمہ بے نظیر بھٹو کی جمہوری اور عوامی خدمات کو خراج تحسین پیش کرنے کا ذریعہ ہے۔
گورنر فیصل کریم کنڈی نے اس بات پر زور دیا کہ ایئرپورٹ کے نام کی بحالی کے لیے عوامی سطح پر شدید مطالبہ موجود ہے۔ انہوں نے وزیر اعظم سے اپیل کی کہ متعلقہ حکام کو اس معاملے پر فوری کارروائی کرنے کی ہدایت دی جائے۔
“عوام کے وسیع مطالبے کو مدنظر رکھتے ہوئے، ضروری ہدایات جاری کی جائیں تاکہ اسلام آباد ایئرپورٹ کا نام ‘نیو اسلام آباد انٹرنیشنل ایئرپورٹ’ سے تبدیل کر کے ‘بے نظیر بھٹو انٹرنیشنل ایئرپورٹ اسلام آباد’ رکھا جائے۔ اس اقدام سے محترمہ بے نظیر بھٹو شہید کی ملک کی بہتری، خوشحالی اور جمہوریت کے لیے کی گئی کاوشوں کو تسلیم کیا جا سکے،”، گورنر خیبرپختونخوا
گورنر نے امید ظاہر کی کہ وزیر اعظم اس حوالے سے مثبت جواب دیں گے۔
واضح رہے کہ اکتوبر 2022 میں پاکستان پیپلز پارٹی کے رکنِ قومی اسمبلی نوابزادہ افتخار نے قومی اسمبلی میں ایک قرارداد پیش کی تھی جس میں اسلام آباد انٹرنیشنل ایئرپورٹ کا نام سابق وزیر اعظم بے نظیر بھٹو کے نام پر رکھنے کا مطالبہ کیا گیا تھا، جسے ایوان نے اکثریتی ووٹ سے منظور کر لیا تھا۔
