بانی پاکستان تحریک انصاف (پی ٹی آئی) سے آج وکلاء اور فیملی کی ملاقات کا دن ہے، جس کے پیش نظر اڈیالہ جیل کے اطراف سیکیورٹی ہائی الرٹ کر دی گئی ہے۔ پولیس کی جانب سے حفاظتی اقدامات سخت کر دیے گئے ہیں اور دفعہ 144 کے تحت غیر ضروری ہجوم کی اجازت نہیں دی جا رہی۔
ذرائع کے مطابق، اڈیالہ جیل کے گرد گورکھپور اور داہگل کے ناکوں پر اضافی پولیس نفری تعینات کی گئی ہے۔ اڈیالہ جیل روڈ پر ہر گاڑی کی سخت چیکنگ کی جا رہی ہے، اور غیرمتعلقہ افراد کو جیل کے اندر جانے کی ہر صورت اجازت نہیں دی جا رہی۔
پولیس حکام کا کہنا ہے کہ دفعہ 144 کی خلاف ورزی کرنے والوں کے خلاف سخت کارروائی کی جائے گی تاکہ جیل کے اطراف امن و امان قائم رہے۔ اضافی نفری کی تعیناتی کا مقصد کسی بھی غیر متوقع صورتحال یا ہنگامی صورت حال سے نمٹنے کے لیے فوری ردعمل ممکن بنانا ہے۔
اس موقع پر جیل کے اندر اور باہر سیکیورٹی کے انتہائی سخت انتظامات کیے گئے ہیں تاکہ ملاقات کے دوران کسی بھی ناخوشگوار واقعے سے بچا جا سکے۔ حکام نے شہریوں اور اہلکاروں سے اپیل کی ہے کہ وہ پولیس کے احکامات پر عمل کریں اور غیر ضروری طور پر جیل کے اطراف نہ جائیں۔
یہ ملاقات سیاسی حلقوں میں بھی خاص اہمیت رکھتی ہے، اور سیکیورٹی کے سخت اقدامات کے سبب ماحول میں کشیدگی اور سسپینس کا عنصر برقرار ہے۔
