اسلام آباد : ماہانہ فیول پرائس ایڈجسٹمنٹ (FPA) کی مد میں بجلی کی قیمتوں میں اضافے کا امکان پیدا ہو گیا ہے۔
سینٹرل پاور پرچیزنگ ایجنسی (CPPA) نے دسمبر کی فیول پرائس ایڈجسٹمنٹ کی درخواست نیپرا (NEPRA) میں جمع کرادی ہے۔
درخواست میں بتایا گیا ہے کہ دسمبر میں 8 ارب 48 کروڑ 70 لاکھ یونٹس بجلی پیدا کی گئی، جبکہ ڈسکوز کو 8 ارب 20 کروڑ 80 لاکھ یونٹس بجلی فراہم کی گئی۔ اس دوران بجلی کی فی یونٹ لاگت 9.62 روپے رہی۔
نیپرا نے اس درخواست کی سماعت کے لیے 29 جنوری کی تاریخ مقرر کی ہے، جس میں فریقین اپنے دلائل پیش کریں گے۔
ذرائع کے مطابق اگر نیپرا درخواست منظور کر دیتا ہے تو صارفین کے لیے بجلی کی قیمتوں میں مزید اضافہ متوقع ہے۔
اس سے قبل بھی فیول پرائس ایڈجسٹمنٹ کی مد میں کئی بار بجلی کے نرخ بڑھ چکے ہیں، جس سے صارفین پر مالی دباؤ میں اضافہ ہوا ہے۔
عوام سے توقع کی جا رہی ہے کہ نیپرا سماعت کے بعد بجلی کی قیمتوں کے حوالے سے حتمی فیصلہ کرے گا۔
یہ بھی پڑھیں : نئے گیس کنکشن کے خواہشمند افراد کےلیے اہم خبر
جبکہ دوسری جانب سوئی ناردرن گیس کمپنی کو ایک ساتھ بڑی تعداد میں نئے گیس کنکشنز کی درخواستیں موصول ہونے کے باعث انتظامی مشکلات کا سامنا کرنا پڑ رہا ہے۔
کمپنی حکام کے مطابق گیس کنکشنز کی فراہمی کھلتے ہی صارفین کی جانب سے غیر معمولی تعداد میں درخواستیں جمع کرائی گئیں جس سے ادارے پر کام کا دباؤ بڑھ گیا ہے۔
سوئی ناردرن گیس کمپنی کو فاسٹ ٹریک کیٹیگری کے تحت تقریباً چار لاکھ نئی درخواستیں موصول ہوئیں، جن میں سے اب تک قریباً 29 ہزار صارفین کو گیس کنکشن فراہم کیے جا چکے ہیں۔
اس کے علاوہ نارمل میرٹ کیٹیگری کے تحت مزید تین لاکھ کے قریب درخواستیں بھی جمع کرائی گئی ہیں،جن پر مرحلہ وار کارروائی جاری ہے۔
