سال کے آغاز سے ہی ایپل کے شائقین میں آئی فون 18 پرو کی ممکنہ لانچ کے حوالے سے خاصا جوش پایا جا رہا ہے۔
اگرچہ اس فلیگ شپ اسمارٹ فون کی باضابطہ ریلیز میں ابھی وقت باقی ہے اور توقع ہے کہ ایپل اسے روایتی طور پر ستمبر میں متعارف کرائے گا، تاہم اس کے ڈیزائن اور فیچرز سے متعلق کئی اہم تفصیلات پہلے ہی منظر عام پر آ چکی ہیں۔
اطلاعات کے مطابق آئی فون 18 پرو کا مجموعی ڈیزائن زیادہ تر اپنے پیشرو جیسا ہوگا، تاہم اس میں 6.3 انچ ڈسپلے، انڈر اسکرین فیس آئی ڈی اور اسکرین کے اوپری بائیں کونے میں فرنٹ کیمرا شامل کیے جانے کا امکان ہے۔ کیمرہ سسٹم میں بھی بہتری متوقع ہے، جس میں کم از کم ایک پچھلے کیمرے کے لیے ویری ایبل اپرچر اور نیا کیمرا کنٹرول بٹن دیا جا سکتا ہے۔
نئے فون میں ایپل کا طاقتور A20 پرو چِپ نصب کیے جانے کی افواہیں بھی گردش کر رہی ہیں، جو کارکردگی اور بیٹری ایفیشنسی میں اضافہ کرے گا۔ اس کے علاوہ میگ سیف چارجنگ کے لیے پچھلے سیرامک شیلڈ میں تبدیلی، 5G کنیکٹیوٹی کے لیے ایپل کا اپنا موڈیم، اور وائی فائی 7، بلوٹوتھ 6 اور تھریڈ سپورٹ کے لیے نیا چِپ شامل کیے جانے کا امکان ظاہر کیا جا رہا ہے۔
رپورٹس کے مطابق آئی فون 18 پرو میں سیٹلائٹ کے ذریعے ویب براؤزنگ کی سہولت بھی متعارف کرائی جا سکتی ہے، جبکہ نئے رنگوں میں برگنڈی، براؤن اور پرپل شامل ہونے کی توقع ہے۔ آئی فون 18 پرو میکس کے بارے میں کہا جا رہا ہے کہ یہ بڑی بیٹری کی وجہ سے قدرے موٹا ہوگا اور اس میں 6.9 انچ ڈسپلے دیا جا سکتا ہے۔
ذرائع کا کہنا ہے کہ ایپل اس بار مرحلہ وار لانچ پالیسی اختیار کر سکتا ہے، جس کے تحت پرو ماڈلز رواں سال کے آخر میں پیش کیے جائیں گے، جبکہ اسٹینڈرڈ آئی فون 18 کی ریلیز 2027 تک موخر ہو سکتی ہے۔ اگرچہ یہ تمام معلومات افواہوں پر مبنی ہیں، تاہم ایپل کی جانب سے باضابطہ اعلان تک ٹیکنالوجی کے شائقین کی دلچسپی برقرار رہنے کی توقع ہے۔
