پاکستان میں سونے کی قیمتوں میں حالیہ دنوں میں ریکارڈ اضافہ کے بعد اب کمی کا سلسلہ بھی جاری ہے، جس نے سرمایہ کاروں اور صارفین دونوں کی توجہ حاصل کر لی ہے۔
آل پاکستان جیمز اینڈ جیولر ایسوسی ایشن کی رپورٹ کے مطابق ملک بھر میں فی تولہ سونے کی قیمت میں آج 25,500 روپے کی کمی دیکھنے میں آئی، جس کے بعد یہ قیمت 511,862 روپے ہو گئی۔ اسی طرح 10 گرام سونے کی قیمت 21,862 روپے کم ہو کر 438,839 روپے تک آ گئی ہے۔
عالمی مارکیٹ میں بھی سونے کی قیمت میں نمایاں کمی دیکھی گئی ہے، جہاں فی اونس سونا 255 ڈالر کی کمی کے بعد 4,895 ڈالر پر آ گیا ہے۔
ماہرین کے مطابق ملک میں گزشتہ روز بھی فی تولہ سونا 35,500 روپے سستا ہوا تھا، جس کے بعد دو روز کے دوران مجموعی کمی 61,000 روپے تک پہنچ گئی ہے، جو سرمایہ کاروں کے لیے اہم سگنل کے طور پر دیکھی جا رہی ہے۔
اقتصادی ماہرین کا کہنا ہے کہ عالمی مارکیٹ میں سونے کی قیمتوں میں اتار چڑھاؤ، مقامی کرنسی کی قدر، اور سرمایہ کاری کے رحجانات ملکی سونے کی قیمت پر براہ راست اثر انداز ہوتے ہیں۔ اس لیے سرمایہ کاروں اور عوام کو مارکیٹ کے رجحانات پر محتاط رہنے کی ضرورت ہے۔
اس صورتحال نے ملک میں سونے کے کاروبار اور صارفین دونوں کے لیے نئی امیدیں پیدا کر دی ہیں، جبکہ سرمایہ کار موجودہ قیمتوں میں اتار چڑھاؤ کو ایک موقع کے طور پر دیکھ رہے ہیں۔
