واشنگٹن: امریکہ نے سعودی عرب کو ایف 15 لڑاکا طیاروں کے پرزے فروخت کرنے کی منظوری دے دی ہے، جس کی کل مالیت 3 ارب ڈالر ہے۔ یہ منظوری امریکی محکمہ دفاع پینٹاگون نے دی ہے۔
پینٹاگون کے مطابق اس معاہدے کے تحت سعودی عرب میں محدود تعداد میں امریکی شہری کنٹریکٹرز یا فوجی عملہ بھی طویل مدتی بنیادوں پر تعینات کیا جا سکتا ہے تاکہ طیاروں کی دیکھ بھال اور آپریشنز کو یقینی بنایا جا سکے۔
یہ منظوری ایسے وقت میں دی گئی ہے جب امریکہ نے 3 روز قبل سعودی عرب کو پیٹریاٹ میزائل فروخت کرنے کی بھی منظوری دی تھی، جس کی مجموعی مالیت تقریباً 9 ارب ڈالر بتائی گئی۔
اس اقدام سے دونوں ممالک کے درمیان فوجی تعلقات مزید مضبوط ہوں گے اور سعودی عرب کی دفاعی صلاحیت میں اضافہ ہوگا۔
اس کے علاوہ امریکی حکومت نے اسرائیل کو 6.5 ارب ڈالر کے فوجی سازوسامان کی فروخت کی بھی منظوری دی ہے، جس سے خطے میں امریکہ کے سیکورٹی اور دفاعی تعلقات کی اہمیت واضح ہوتی ہے۔
یہ بھی پڑھیں : ایران کے ساتھ مذاکرات جاری، امید ہے کامیابی ملے گی، صدر ٹرمپ
پینٹاگون کے عہدیداروں کا کہنا ہے کہ یہ فوجی سازوسامان فروخت کرنے کے معاہدے ریجن میں دفاعی توازن برقرار رکھنے اور اتحادی ممالک کی سلامتی کو یقینی بنانے کے لیے کیے گئے ہیں۔
سعودی عرب کے لیے یہ فروخت نہ صرف جدید لڑاکا طیاروں کے آپریشن کو بہتر بنانے میں مددگار ہوگی بلکہ ان کے دفاعی نظام کو جدید خطوط پر استوار کرے گی، جبکہ امریکہ کے لیے یہ خطے میں اپنی عسکری موجودگی کو مضبوط کرنے کا ایک اہم اقدام ہے۔
