ٹیکنالوجی کے شوقین افراد کے لیے بڑی خوشخبری سامنے آئی ہے۔ معروف امریکی کمپنی Apple Inc. جلد کم قیمت آئی فون متعارف کرانے کی تیاری کر رہی ہے، جس سے عام صارفین کے لیے آئی فون خریدنا آسان ہوسکے گا۔
آئی فون ہمیشہ سے اپنی جدید ٹیکنالوجی اور پریمیم ڈیزائن کے باعث مقبول رہا ہے، تاہم زیادہ قیمت ہونے کے باعث یہ ہر کسی کی پہنچ میں نہیں ہوتا۔ اب اطلاعات ہیں کہ کمپنی ایک نیا کم قیمت ماڈل متعارف کرانے جا رہی ہے جو جدید فیچرز کے ساتھ نسبتاً سستا ہوگا۔
معروف جریدے Bloomberg کی رپورٹ کے مطابق ایپل آئندہ برس آئی فون 17 ای لانچ کرنے کی منصوبہ بندی کر رہا ہے، جو گزشتہ سال متعارف کرائے گئے آئی فون 16 ای کے بعد پیش کیا جائے گا۔ آئی فون 16 ای کو کم قیمت رکھنے کے لیے پرانے ہارڈویئر کے ساتھ متعارف کرایا گیا تھا۔
رپورٹ کے مطابق نئے آئی فون 17 ای میں زیادہ طاقتور پروسیسر شامل ہوگا، جو ممکنہ طور پر مکمل قیمت والے آئی فون 17 جیسا ہوگا۔
اس کے علاوہ اس ڈیوائس میں ایپل کے اپنے تیار کردہ جدید سیلولر اور وائی فائی چپس بھی دیے جانے کا امکان ہے، جس سے کارکردگی اور کنیکٹیویٹی بہتر ہوگی۔
یہ بھی پڑھیں : ٹی20 ورلڈ کپ:پاکستان نے امریکا کو شکست دیدی
اہم بات یہ ہے کہ کم قیمت آئی فون ماڈلز میں پہلی مرتبہ وائرلیس MagSafe چارجنگ کی سہولت شامل کیے جانے کی توقع ہے، جو اس سے پہلے زیادہ مہنگے ماڈلز تک محدود تھی۔
ماہرین کے مطابق اگر ایپل واقعی جدید فیچرز کے ساتھ کم قیمت آئی فون پیش کرنے میں کامیاب ہوجاتا ہے تو اس سے عالمی اسمارٹ فون مارکیٹ میں مقابلہ مزید سخت ہو جائے گا اور دیگر کمپنیوں پر بھی قیمتوں میں کمی کا دباؤ بڑھے گا۔
ٹیکنالوجی صارفین اب باضابطہ اعلان کا انتظار کر رہے ہیں، جو آئندہ مہینوں میں متوقع ہے۔
