پشاور: پاک افغان سرحد پر حالیہ فضائی کارروائیوں اور بڑھتے ہوئے تناؤ کے پیشِ نظر حکومتِ پاکستان اور سکیورٹی اداروں نے خیبر پختونخوا کے سرحدی اضلاع میں دفاعی انتظامات مزید سخت کر دیے ہیں۔
سرحدی مقامات پر جدید اینٹی ڈرون سسٹمز کو فعال کر دیا گیا ہے تاکہ کسی بھی مشکوک یا جاسوس ڈرون کی نقل و حرکت کو بروقت شناخت کیا جا سکے اور اسے جام (Jam) یا مار گرایا جا سکے۔
سکیورٹی ذرائع کے مطابق یہ اقدام خاص طور پر حساس علاقوں اور سکیورٹی فورسز کی چوکیوں کے تحفظ کے لیے ضروری قرار دیا گیا ہے۔
صوبے بھر میں سکیورٹی ہائی الرٹ کر دی گئی ہے اور ضم شدہ اضلاع میں پاک فوج اور فرنٹیئر کور کے جوانوں کے گشت میں اضافہ کیا گیا ہے۔
سکیورٹی فورسز کو ہدایت کی گئی ہے کہ سرحد پار سے کسی بھی اشتعال انگیزی یا مشکوک کارروائی پر فوری اور فیصلہ کن ردعمل دیں۔
یہ بھی پڑھیں : پاک افغان کشیدگی: امریکا نے پاکستان کے دفاعی حق کی کھل کر حمایت کر دی
حکام کا کہنا ہے کہ یہ دفاعی اقدامات ملک کی فضائی حدود کی حرمت اور شہریوں کے تحفظ کے لیے ناگزیر ہیں۔ عوام کو بھی ہدایت کی گئی ہے کہ وہ کسی بھی ہنگامی یا مشکوک صورتحال میں سکیورٹی اداروں کے ساتھ تعاون کریں اور فوری اطلاع دیں۔
یہ اقدامات اس بات کی عکاسی کرتے ہیں کہ پاکستان اپنی سرحدوں کے تحفظ اور فضائی حدود کی حرمت برقرار رکھنے کے لیے مکمل تیار ہے، جبکہ شہریوں کی حفاظت کو ہر حال میں یقینی بنایا جا رہا ہے۔
