کراچی شہر کے مصروف علاقے اولڈ سٹی میں پولیس نے غیر قانونی مقیم افغان باشندوں کے خلاف بڑے پیمانے پر آپریشن کیا۔ ایس ایس پی سٹی عارف عزیز نے تصدیق کی ہے کہ آپریشن کے دوران غیر قانونی طور پر مقیم 98 افغان شہریوں کو حراست میں لیا گیا۔
عارف عزیز نے بتایا کہ اس کارروائی کا مقصد علاقے میں غیر قانونی رہائش پزیر افراد کے خلاف قانون کا نفاذ کرنا اور رہائشی ایکٹ کی خلاف ورزی کرنے والوں کو پکڑنا تھا۔ آپریشن کے دوران رہائشی ایکٹ کی خلاف ورزی کرنے والے 61 دیگر ملزمان کو بھی گرفتار کیا گیا، جن پر قانونی کارروائی کی جا رہی ہے۔
ایس ایس پی نے بتایا کہ گرفتار افراد کی شناخت اور قانونی حیثیت کی تصدیق کے بعد متعلقہ حکام کے سپرد کیا جائے گا۔ پولیس کا کہنا ہے کہ یہ کارروائی عوامی تحفظ اور امن و امان قائم رکھنے کے لیے ضروری تھی، اور شہر میں غیر قانونی مقیم افراد کے خلاف مزید اقدامات کیے جائیں گے۔
اولڈ سٹی ایریا میں یہ آپریشن مقامی کمیونٹی اور کاروباری حضرات کے لیے بھی ایک اہم پیغام تھا کہ قانون شکنی کی کسی صورت برداشت نہیں کی جائے گی۔ پولیس کے مطابق علاقے میں موجود دیگر غیر قانونی مقیم افراد کے خلاف بھی مزید کارروائیاں کی جائیں گی تاکہ شہر میں امن و امان برقرار رہے۔
