صوبہ خیبر پختون خوا کے شہرڈیرہ اسماعیل خان میں دفعہ 144 کے تحت سخت پابندیاں نافذ کر دی گئی ہیں، جس کے باعث شہر کے مختلف علاقوں میں آج ٹریفک معطل رہے گی۔
سرکاری نوٹیفکیشن کے مطابق پابندیاں آج صبح 6 بجے سے شام 6 بجے تک جاری رہیں گی۔ اس دوران Dera Tank Road پر طارق شہید سے بھگووال تک ٹریفک بند رہے گی۔ اسی طرح پوٹہ ہتھالہ بازار بھی صبح 6 بجے سے شام 6 بجے تک بند رکھنے کی ہدایات جاری کی گئی ہیں۔
ڈپٹی کمشنر (ڈی سی) نے واضح کیا ہے کہ ایمبولینس، فائر بریگیڈ اور قانون نافذ کرنے والے اداروں کو اس پابندی سے استثنیٰ حاصل ہوگا۔ ہنگامی صورت میں پولیس یا سیکیورٹی فورسز کی اجازت کے ساتھ محدود نقل و حرکت کی اجازت دی جائے گی۔
حکام کا کہنا ہے کہ یہ اقدام شہر میں امن و امان کو برقرار رکھنے، ممکنہ ہنگامی صورتحال سے نمٹنے اور شہریوں کی حفاظت کے لیے اٹھایا گیا ہے۔ شہریوں سے درخواست کی گئی ہے کہ وہ ہدایات کی مکمل پابندی کریں اور غیر ضروری سفر سے گریز کریں تاکہ کسی بھی ناخوشگوار واقعے سے بچا جا سکے۔
اس پابندی کے دوران شہری نقل و حمل کے لیے متبادل راستوں اور ضروری انتظامات کو مدنظر رکھیں۔ پولیس اور سیکیورٹی ادارے ہر ممکنہ خطرے سے نمٹنے کے لیے چوکس ہیں اور شہریوں کی سہولت اور حفاظت کو یقینی بنانے کے لیے تمام ضروری اقدامات کر رہے ہیں۔
