آئل اینڈ گیس ریگولیٹری اتھارٹی (اوگرا) نے ملک میں ایل پی جی کی قیمتوں میں اضافے کے حوالے سے پھیلائی جانے والی خبروں کو سختی سے مسترد کر دیا ہے۔ اوگرا کے مطابق، کوئی نیا نوٹیفکیشن جاری نہیں کیا گیا اور ایل پی جی کی قیمتیں ہر ماہ کی پہلی تاریخ سے ہی نافذ العمل ہوتی ہیں۔
اعلامیے میں واضح کیا گیا ہے کہ ایل پی جی کی قیمتوں میں اضافہ کے حوالے سے پھیلائی جانے والی ہر دعویٰ یا افواہ بے بنیاد اور غلط ہے۔ اوگرا نے صارفین سے اپیل کی ہے کہ وہ مقررہ قیمت پر ایل پی جی خریدیں اور اگر کسی جگہ زیادہ قیمت وصول کی جائے تو فوری طور پر مقامی انتظامیہ سے رابطہ کریں۔
اوگرا نے مزید کہا کہ وہ ملک میں ایل پی جی کی قیمتوں میں شفافیت برقرار رکھنے کے لیے پرعزم ہے اور صارفین کو درست معلومات فراہم کرنے کا سلسلہ جاری رکھے گا۔
یہ اعلان ایسے وقت میں سامنے آیا ہے جب مشرق وسطیٰ کی کشیدہ صورتحال اور عالمی سطح پر ایندھن کی قیمتوں میں اتار چڑھاؤ کے سبب مارکیٹ میں خدشات پھیل گئے تھے، تاہم اوگرا نے عوام کو یقین دلایا کہ ملک میں ایل پی جی کی قیمتوں میں کوئی اضافہ نہیں ہوا۔
