انقرہ : ایرانی بیلسٹک میزائلوں کے خطرے کے پیش نظر نیٹو نے ترکیے میں پیٹریاٹ ڈیفنس سسٹم نصب کر دیا۔
مشرقِ وسطیٰ میں بڑھتی ہوئی جنگی کشیدگی اور ایرانی بیلسٹک میزائلوں کے ممکنہ خطرے کے پیشِ نظر، نیٹو نے ترکیہ کے فضائی دفاع کو مضبوط بنانے کے لیے پیٹریاٹ میزائل ڈیفنس سسٹم نصب کر دیا ہے۔
ترک فوج کے مطابق، یہ جدید ترین دفاعی نظام ترکیہ کے تزویراتی لحاظ سے اہم علاقے آدانا میں لگایا گیا ہے، جو خطے میں کسی بھی فضائی مہم جوئی کو روکنے کی صلاحیت رکھتا ہے۔
یہ نیا پیٹریاٹ سسٹم نیٹو کی پہلے سے موجود ریڈار بیس کے قریب کام کرے گا، تاکہ دشمن کے میزائلوں کی بروقت نشاندہی اور انہیں فضا میں ہی تباہ کرنا ممکن ہو سکے۔
آدانا میں واقع انجرلک ایئر بیس پر امریکہ اور دیگر اتحادی ممالک کے فوجی اہلکار بڑی تعداد میں تعینات ہیں، اور اس سسٹم کی تنصیب کا ایک بڑا مقصد اس بیس اور وہاں موجود بین الاقوامی افواج کو تحفظ فراہم کرنا ہے۔
یہ بھی پڑھیں : اسرائیل کے حملے اور ایران-قطر کشیدگی: ٹرمپ نے مزید حملوں کی مخالفت کر دی
ماہرین کا کہنا ہے کہ ایران اور اسرائیل کے درمیان جاری براہِ راست ٹکراؤ کے باعث ترکیہ کی سرحدوں پر خطرات بڑھ گئے ہیں، جس کے بعد فضائی دفاعی نظام کو اپ گریڈ کرنا ناگزیر ہو گیا تھا۔
ترکیہ نے واضح کیا ہے کہ یہ اقدامات خالصتاً دفاعی نوعیت کے ہیں تاکہ جنگ کے اثرات کو ملک کے اندرونی علاقوں تک پہنچنے سے روکا جا سکے اور نیٹو کے رکن ملک کی حیثیت سے اپنی سرحدوں کا تحفظ یقینی بنایا جا سکے۔
اس دفاعی نظام کی شمولیت سے خطے میں نیٹو کی فضائی نگرانی اور جوابی کارروائی کی صلاحیت میں نمایاں اضافہ ہوا ہے۔
