مشیر خزانہ مزمل اسلم نے اعلان کیا ہے کہ کل ملک میں پٹرولیم مصنوعات کی قیمتوں میں ممکنہ اضافہ متوقع ہے، تاہم خیبرپختونخوا حکومت عوامی ریلیف کے لیے موثر اقدامات کر رہی ہے۔
مزمل اسلم نے کہا کہ حکومت نے پٹرولیم لیوی سے اب تک 8 ہزار ارب روپے کی آمدنی حاصل کی ہے اور صرف پچھلے 15 دنوں میں صوبائی حکومت نے دو بار تنخواہیں ادا کی ہیں، جس سے عوام کے مالی مسائل میں کمی آئی ہے۔
انہوں نے مزید بتایا کہ صوبائی حکومت نے دو انشورنس کمپنیاں قائم کرنے اور سیلاب سے متاثرہ علاقوں کے لیے مخصوص فنڈ بنانے کا فیصلہ کیا ہے، جس کے پہلے مرحلے میں 5 ارب روپے رکھے جائیں گے۔ اس فنڈ کے قیام سے نہ صرف صوبائی حکومت پر مالی بوجھ نہیں پڑے گا بلکہ متاثرہ علاقوں میں بروقت ریلیف بھی فراہم کیا جا سکے گا۔
مزمل اسلم نے کہا کہ خیبرپختونخوا حکومت صرف احتجاج نہیں کر رہی بلکہ عوام کو حقیقی معنوں میں ریلیف بھی فراہم کر رہی ہے، اور عوام کے تحفظ اور فلاح کے لیے تمام ضروری اقدامات کیے جا رہے ہیں۔
