دبئی: بھارت کے اسٹار بیٹر ویرات کوہلی نیوزی لینڈ کے خلاف آئی سی سی چیمپئنز ٹرافی کے فائنل سے قبل انجری کا شکار ہوگئے ہیں۔
چیمپئنز ٹرافی کا فائنل اتوار کو بھارت اور نیوزی لینڈ کے درمیان دبئی میں کھیلا جائے گا۔
کوہلی جمعہ کو آئی سی سی اکیڈمی میں نیٹ پریکٹس کے دوران ایک معمولی چوٹ کا شکار ہوئے۔ رپورٹ کے مطابق، کوہلی نیٹس میں فاسٹ بولنگ کا سامنا کر رہے تھے اور اس دوران ایک تیز گیند ان کے گھٹنے پر جا لگی۔ جیسے ہی یہ چوٹ آئی، کوہلی نے فوری طور پر پریکٹس روک دی۔
بھارتی ٹیم کے فزیو اسٹاف نے فوراً کوہلی کا معائنہ کیا، اسپرے لگایا اور متاثرہ جگہ پر بینڈیج باندھ دی۔ تاہم، چوٹ کے باوجود کوہلی نے گراؤنڈ میں موجود رہ کر بقیہ ٹریننگ سیشن کو دیکھا اور اپنے ساتھی کھلاڑیوں اور کوچنگ اسٹاف کو اپنی فٹنس کے بارے میں بتایا۔
یہ بھی پڑھیں ویرات کوہلی نے ون ڈے کرکٹ میں 300 میچز کا سنگ میل عبور کیا
بھارتی کوچنگ اسٹاف نے اس بات کی وضاحت کی کہ کوہلی کی چوٹ سنگین نہیں ہے اور وہ فائنل میں کھیلنے کے لیے مکمل طور پر فٹ ہوں گے۔
یہ چوٹ بھارت کے لیے ایک تشویش کا باعث تھی، تاہم کوہلی کے اس انداز میں پریکٹس جاری رکھنے اور اپنی فٹنس پر واضح بیان سے بھارت کے شائقین کو سکون ملا ہے۔
