پشاور: پاکستان تحریک انصاف (پی ٹی آئی) کی قیادت نے اڈیالہ جیل کے باہر احتجاجی کیمپ کے معاملے پر آج شام اہم اجلاس طلب کر لیا۔ یہ اجلاس افطار کے بعد پشاور میں ہوگا، جس میں پارٹی کے اہم رہنما اور عہدیدار شرکت کریں گے۔
پی ٹی آئی پنجاب کی تمام اسٹیک ہولڈرز کو اجلاس میں شرکت کے لیے پشاور بلا لیا گیا ہے، جبکہ پارٹی کی کچھ قیادت نے اس اجلاس کو لاہور میں بلانے کا مطالبہ کیا تھا۔ تاہم، پارٹی رہنما سلمان اکرم راجہ نے اجلاس پشاور میں منعقد کرنے کا فیصلہ کیا۔
ذرائع کے مطابق، اجلاس میں اڈیالہ جیل کے باہر احتجاجی کیمپ لگانے کا حتمی فیصلہ کیا جائے گا۔ پی ٹی آئی پنجاب پہلے ہی احتجاجی کیمپ لگانے کے لیے تمام تیاریاں مکمل کر چکی ہے، تاہم اس کا حتمی اعلان مرکزی قیادت کی منظوری کے بعد کیا جائے گا۔
پارٹی ذرائع کے مطابق، پی ٹی آئی قیادت کو بانی چیئرمین عمران خان سے ملاقات میں مسلسل مشکلات اور رکاوٹوں کا سامنا ہے، جس کی وجہ سے احتجاجی کیمپ لگانے کا فیصلہ کیا جا رہا ہے تاکہ کارکنان اور رہنما اپنے مؤقف کو مؤثر انداز میں سامنے لا سکیں۔
اجلاس میں عالیہ حمزہ سمیت دیگر اہم رہنما بھی شریک ہوں گے، جو احتجاجی حکمت عملی پر مشاورت کریں گے۔ پی ٹی آئی کی قیادت کا ماننا ہے کہ اڈیالہ جیل کے باہر احتجاجی کیمپ سیاسی دباؤ بڑھانے کا ایک مؤثر طریقہ ثابت ہوگا۔
