گورنر خیبر پختونخوا فیصل کریم کنڈی کا گذشتہ شب پاکستان میں تعینات مسلم ممالک کے سفراء کے اعزاز میں افطار ڈنر میں قائمقام صدر پاکستان اور چیئرمین سینٹ سید یوسف رضا گیلانی نے خصوصی دعوت پر شرکت کی۔
افطار ڈنر میں مسلم ممالک ترکی، ملائشیا، انڈونیشیا، قازقستان، نائجریا، موروکو، بحرین، اعزازی سفیر تیونس، اردن،آذربائیجان، دارالاسلام، سوڈان، شام، تاجکستان، صومالیہ کے سفیروں کی شرکت افطار ڈنر میں سعودی عرب،افغانستان،ایران،مصر اور لیبیا کےسفیروں کے نمائندے بھی شریک ہوئے۔
افطار ڈنر میں وفاقی وزیر مذہبی امور سردار محمد یوسف، وزیراعظم کے مشیر داخلہ پرویز خٹک، ارکان قومی اسمبلی عاصمہ ارباب عالمگیر، سردار فتح اللہ خان میانخیل، چیئرمین بینظیر انکم سپورٹ پروگرام روبینہ خالد، ارکان صوبائی اسمبلی احمد کریم کنڈی، ارباب زرک، پاکستان پیپلز پارٹی کے صوبایئ صدر محمد علی شاہ باچا سمیت وزارت امور خارجہ کے افسران بھی شریک تھے ۔
گورنر خیبر پختونخوا کی میزبانی میں افطار ڈنر میں مسلم اُمہ کے اتحاد، وحدت اور اسلامو فوبیا کے بڑھتے رحجان پر گفتگو کی گئی،مسلم ممالک کے سفراء نے عالمی سطح پر امت مسلمہ کے اتحاد کیلئے پاکستانی حکومت و عوام کے کردار کو سراہا۔
مسلم ممالک کے سفراء نے خیبر پختونخوا میں گورنر فیصل کریم کنڈی کی صوبائی ترقی و قیام امن کیلئے سنجیدہ کوششوں کی بھی تعریف کی، ماہ رمضان امت مسلمہ کے اتحاد، بھائی چارے اور سلامتی کا مقدس مہینہ ہے۔
فیصل کریم کنڈی نے کہاکہ عصر حاضر کا تقاضا ہے کہ تمام مسلم ممالک یکجا ہو کر امت مسلمہ کے مفادات اور دنیا میں بڑھتے ہوئے اسلامو فوبیا کے رحجان کے خاتمہ کیلئے ٹھوس مشترکہ جامع حکمت عملی تیار کریں۔
انہو ں نے کہاکہ اسلام امن اور خیر کا دین ہےجس میں انسانیت کی بھلائی اور دیگر مذاہب کے احترام کا درس دیا گیا ہے۔
