سکیورٹی فورسز نے ڈیرہ اسماعیل خان میں ایک کامیاب آپریشن کے دوران 10 خوارج کو ہلاک کر دیا، جب کہ دہشت گردوں کی فائرنگ کے نتیجے میں پاک فوج کے کیپٹن حسنین اختر شہید ہو گئے۔
پاک فوج کے شعبہ تعلقاتِ عامہ (آئی ایس پی آر) کے مطابق سکیورٹی فورسز نے خفیہ اطلاعات کی بنیاد پر آپریشن کیا جس کے دوران دہشت گردوں اور فورسز کے درمیان شدید فائرنگ کا تبادلہ ہوا۔ آپریشن میں 10 دہشت گرد ہلاک ہوئے، جن سے ہتھیار اور گولا بارود برآمد کیا گیا۔
آئی ایس پی آر کے مطابق فائرنگ کے دوران کیپٹن حسنین اختر شہید ہو گئے۔ وہ اپنے فرائض کی انجام دہی کے دوران دہشت گردوں کی فائرنگ کا شکار ہوئے۔ کیپٹن حسنین اختر کا تعلق ضلع جہلم سے تھا اور انہوں نے 4 سال تک وطن کی حفاظت کے لیے اپنی خدمات انجام دیں۔
آئی ایس پی آر نے مزید کہا کہ ہلاک ہونے والے دہشت گرد متعدد دہشت گردی کی کارروائیوں میں ملوث تھے اور بے گناہ شہریوں کی ٹارگٹ کلنگ میں بھی ان کا ہاتھ تھا۔
یہ بھی پڑھیں ڈی آئی خان، ضلعی انتطامیہ کا جرمانوں کی وصولیوں کے لئے ’’ای فائنز پورٹل‘‘ کا اجراء
آئی ایس پی آر نے یہ بھی بتایا کہ آپریشن کے دوران مارے گئے دہشت گردوں سے حاصل ہونے والی معلومات کی بنیاد پر علاقے میں دیگر ممکنہ خوارج کے خاتمے کے لیے کلیئرنس آپریشن جاری ہے۔
کیپٹن حسنین اختر شہید کے اہل خانہ میں والدین اور بہن بھائی شامل ہیں، جنہوں نے اپنے عزیز کو قومی خدمت میں اپنی جان قربان کرتے ہوئے کھو دیا۔ پاک فوج نے شہید کی قربانی کو شاندار الفاظ میں خراجِ تحسین پیش کیا ہے اور ان کی خدمات کو ہمیشہ یاد رکھا جائے گا۔
