رہنما تحریک انصاف علی محمد خان نے کہا ہے کہ امریکی قرارداد سے پی ٹی آئی کا کوئی تعلق نہیں ہے اور پارٹی اپنے قائد عمران خان کو بغیر کسی بیرونی مدد کے آزاد کرے گی۔
انہوں نے اس بات کو واضح کیا کہ پی ٹی آئی اپنے سیاسی ایجنڈے کے مطابق اپنے لیڈر کی رہائی کے لیے کام کر رہی ہے اور اس مقصد کے لیے وہ کسی بیرونی طاقت کی مدد کی ضرورت نہیں سمجھتے۔
نجی ٹی وی چینل سے گفتگو کرتے ہوئے علی محمد خان نے کہا کہ ملک میں موجودہ سیاسی صورتحال نے عوام کو بے چینی میں مبتلا کر دیا ہے، اور ملک کو ایک سیاسی ابتری کی طرف دھکیلا جا رہا ہے۔
علی محمد خان نے مزید کہا کہ عمران خان کی رہائی صرف پی ٹی آئی کے لیے نہیں بلکہ پورے سیاسی نظام کے لیے ضروری ہے۔ ان کا کہنا تھا کہ اگر بانی جماعت کو رہائی نہیں ملتی تو ملک میں جاری سیاسی بحران مزید شدت اختیار کر سکتا ہے۔
یہ بھی پڑھیں جب بھی پاکستان پر اٹیک ہوگا تو پھر ہم سب ایک ہونگےاور ہم سب ایک ہیں،علی محمد خان
رہنما تحریک انصاف نے واضح کیا کہ پی ٹی آئی کا مؤقف مضبوط ہے اور وہ اپنے قائد کی رہائی کے لیے کسی بھی قسم کی سیاسی یا قانونی جدوجہد سے پیچھے نہیں ہٹے گی۔
