پشاور: سٹی ٹریفک پولیس پشاور نے عید الفطر کے موقع پر شہر میں ٹریفک کی روانی برقرار رکھنے کے لیے منظم ٹریفک پلان تشکیل دے دیا ہے۔ چیف ٹریفک آفیسر ہارون رشید خان کی سربراہی میں ہونے والے اجلاس میں اس حوالے سے تفصیلی گفتگو کی گئی اور ضروری اقدامات کا اعلان کیا گیا۔
ٹریفک پلان کے تحت شہر میں چار ایس پیز، 12 ڈی ایس پیز اور 1000 سے زائد ٹریفک وارڈنز کو تعینات کیا گیا ہے۔ اس کے علاوہ 54 رائیڈرز اور 18 فورک لفٹرز بھی ڈیوٹی انجام دیں گے، جو ٹریفک روانی کو برقرار رکھنے اور رش کنٹرول کرنے میں مدد دیں گے۔
چیف ٹریفک آفیسر نے واضح کیا کہ ون ویلنگ، غیر رجسٹرڈ گاڑیوں، فینسی نمبر پلیٹس اور کالے شیشوں کے استعمال کے خلاف سخت قانونی کارروائی کی جائے گی۔ شہریوں کو ہدایت کی گئی ہے کہ وہ غلط پارکنگ اور ٹریفک میں خلل ڈالنے سے گریز کریں، بصورت دیگر سخت قانونی کارروائی عمل میں لائی جائے گی۔
چیف ٹریفک آفیسر ہارون رشید خان نے شہریوں سے اپیل کی کہ وہ عید کے دوران ٹریفک قوانین کی پاسداری کریں اور ٹریفک اہلکاروں سے تعاون کریں تاکہ ٹریفک کی روانی متاثر نہ ہو۔ انہوں نے مزید کہا کہ جہاں کہیں بھی شہریوں کو مشکلات درپیش ہوں گی، سٹی ٹریفک پولیس فوری مدد فراہم کرے گی۔
یہ ٹریفک پلان اس بات کو یقینی بنائے گا کہ عید الفطر کے دوران شہریوں کو سفری مشکلات کا سامنا نہ کرنا پڑے اور ٹریفک رواں دواں رہے۔
