پی ٹی آئی کی احتجاجی سیاست میں واپسی، پارٹی نے لائحہ عمل تیارکرلیا، شبلی فراز

شبلی فراز نے کہا ہے کہ پارٹی نے احتجاجی سیاست کے دوبارہ آغاز کے لیے مکمل لائحہ عمل تیار کرلیا ہے۔ ان کے مطابق پارٹی ایک بار پھر سیاسی میدان میں بھرپور طریقے سے متحرک ہونے جا رہی ہے۔

نجی ٹی وی چینل (جیو نیوز) سے گفتگو کرتے ہوئے شبلی فراز نے انکشاف کیا کہ پی ٹی آئی گزشتہ تین سال سے احتجاجی سیاست میں سرگرم ہے، تاہم 26 نومبر کے بعد اس جدوجہد میں وقتی تعطل آیا۔ انہوں نے کہا کہ ’’ہمیں یہ توقع نہیں تھی کہ ہم پر گولیاں چلائی جائیں گی، اسی وجہ سے وقتی طور پر پیچھے ہٹے، لیکن اب ہم دوبارہ منظم ہو رہے ہیں۔‘‘

شبلی فراز کے مطابق پارٹی بانی عمران خان سے ہونے والی حالیہ ملاقاتوں کے بعد تنظیمی سطح پر سرگرمیاں بحال ہو گئی ہیں۔ عمران خان نے عہدیداروں کو ایک بار پھر سیاسی جدوجہد شروع کرنے کی ہدایت دے دی ہے، جس کے بعد ملک بھر میں احتجاجی حکمت عملی ترتیب دی جا رہی ہے۔

رہنما پی ٹی آئی نے کہا کہ کسی بھی مؤثر احتجاج کے لیے وزیراعلیٰ کا کردار کلیدی ہوتا ہے، اسی لیے خیبرپختونخوا کے وزیراعلیٰ علی امین گنڈاپور احتجاجی سرگرمیوں میں جنید اکبر کو مکمل سپورٹ کریں گے۔

انہوں نے یہ بھی بتایا کہ جنید اکبر کو خود بانیٔ پی ٹی آئی نے اس ذمے داری کے لیے منتخب کیا ہے اور ان پر مکمل اعتماد ظاہر کیا ہے۔ شبلی فراز کے مطابق یہ احتجاج مکمل طور پر آئینی و قانونی دائرے میں رہتے ہوئے ہوگا۔

پی ٹی آئی کی قیادت کے اس اعلان کو سیاسی تجزیہ کار پارٹی کی دوبارہ سیاسی متحرک ہونے کی جانب اہم قدم قرار دے رہے ہیں، جو آنے والے دنوں میں ملک کی سیاسی فضا پر گہرا اثر ڈال سکتا ہے۔