امریکی صدر ڈونلڈ ٹرمپ کے ستمبر کے تیسرے ہفتے میں پاکستان کے دورے کا امکان ظاہر کیا جا رہا ہے، جس کے لیے سفارتی اور حکومتی سطح پر تیاریاں شروع ہو چکی ہیں۔
حکومتی ذرائع کے مطابق پاکستان اور امریکہ اس ممکنہ دورے کے سلسلے میں مکمل رابطے میں ہیں اور مختلف سطحوں پر رابطوں میں تیزی آ چکی ہے۔
نجی ٹی وی چینل (آج نیوز)کے مطابق صدر ٹرمپ ستمبر میں ایشیائی ممالک کے ایک اہم دورے پر روانہ ہوں گے، جس میں ان کا پاکستان، بھارت اور چین جانا متوقع ہے۔ یہ دورہ خطے میں بڑھتی ہوئی جیوپولیٹیکل سرگرمیوں کے تناظر میں غیر معمولی اہمیت کا حامل قرار دیا جا رہا ہے۔
اعلیٰ سطحی ملاقاتوں کا امکان
مجوزہ دورے کے دوران امریکی صدر کی پاکستانی قیادت، عسکری و سیاسی حکام سے اہم ملاقاتیں متوقع ہیں جن میں:
دو طرفہ تعلقات
سکیورٹی تعاون اور انسداد دہشتگردی
علاقائی امن و استحکام
افغانستان کی صورتحال
اقتصادی شراکت داری
جیسے اہم امور زیر غور آئیں گے۔
ایک تاریخی دورہ
ذرائع کا کہنا ہے کہ اگر یہ دورہ طے پاتا ہے تو یہ سابق امریکی صدر جارج ڈبلیو بش کے بعد کسی بھی امریکی صدر کا پہلا دورۂ پاکستان ہوگا، جو پاک-امریکہ تعلقات میں ایک نئے باب کا آغاز ہو سکتا ہے۔
ادھر واشنگٹن میں موجود سفارتی ذرائع نے بھی اس دورے کی تصدیق کرتے ہوئے بتایا ہے کہ ستمبر کے تیسرے ہفتے میں ایشیا کے تین بڑے ممالک پاکستان، بھارت اور چین — صدر ٹرمپ کے ممکنہ دورے کے ایجنڈے پر موجود ہیں، اور جلد اس حوالے سے حتمی شیڈول جاری کیا جائے گا۔
پاکستان میں مثبت توقعات
پاکستانی حلقوں میں اس دورے کو غیر معمولی اہمیت دی جا رہی ہے، اور اُمید کی جا رہی ہے کہ اس سے نہ صرف سفارتی تعلقات مضبوط ہوں گے بلکہ اقتصادی اور سیکیورٹی تعاون میں بھی نئی جہت پیدا ہوگی۔
