نیشنل ڈیزاسٹر مینجمنٹ اتھارٹی (این ڈی ایم اے) نے 25 جولائی تک ملک بھر میں شدید بارشوں، لینڈ سلائیڈنگ اور گلیشیائی جھیلوں کے پھٹنے (جی ایل او ایف ایونٹس) کے ممکنہ خدشات سے خبردار کر دیا ہے۔ اتھارٹی نے عوام، مقامی انتظامیہ اور سیاحوں سے غیر ضروری سفر سے گریز اور احتیاطی تدابیر اختیار کرنے کی اپیل کی ہے۔
شمالی علاقے سب سے زیادہ خطرے میں
این ڈی ایم اے کے ترجمان کے مطابق شمالی علاقوں میں مسلسل اور شدید مون سون بارشوں کے باعث زمین کھسکنے اور گلیشیائی جھیلوں کے پھٹنے سے سیلابی صورتحال پیدا ہو سکتی ہے۔
متاثرہ علاقوں میں:
ریشون
بریپ
بونی
سردار گول
ٹھلو
ہنارچی
درکوٹ
اشکومن
شامل ہیں، جہاں خطرے کا لیول بڑھ چکا ہے۔
دریاؤں میں طغیانی کا خطرہ
ترجمان کے مطابق ملک کے بڑے دریاؤں میں پانی کے بہاؤ میں اضافہ متوقع ہے، جن میں شامل ہیں:
دریائے سندھ (تربیلا، کالا باغ، چشمہ، تونسہ، گڈو بیراج)
دریائے چناب (مرالہ، خانکی، قادرآباد – نچلے سے درمیانے درجے کا سیلاب)
دریائے جہلم (منگلا)
دریائے کابل (نوشہرہ)
خیبرپختونخوا اور گلگت بلتستان میں الرٹ
خیبرپختونخوا میں دریائے سوات، پنجکوڑہ اور دیگر ندی نالوں میں طغیانی کا خدشہ ظاہر کیا گیا ہے۔ گلگت بلتستان میں ہنزہ، شگر اور ملحقہ ندی نالوں میں سیلابی صورتحال پیدا ہو سکتی ہے، جبکہ شمشال، ہوشے، سالتورو اور گرد و نواح میں فلیش فلڈز کا خطرہ موجود ہے۔
بلوچستان بھی متاثر ہونے کا امکان
بلوچستان کے اضلاع ژوب، شیرانی، سبی اور موسیٰ خیل میں بھی ندی نالوں میں طغیانی کے امکانات ظاہر کیے گئے ہیں، جہاں مقامی آبادی کو پیشگی احتیاطی اقدامات کی ہدایت کی گئی ہے۔
شاہراہیں بند، سیاحوں کو الرٹ
این ڈی ایم اے کے مطابق شدید بارشوں اور لینڈ سلائیڈنگ کے باعث شاہراہِ قراقرم اور بابوسر ٹاپ دونوں جانب سے بند ہو چکے ہیں۔ ترجمان نے سیاحوں کو 25 جولائی تک پہاڑی علاقوں کے سفر سے اجتناب کرنے کی ہدایت کی ہے تاکہ جانی و مالی نقصان سے بچا جا سکے۔
انتظامیہ نے متعلقہ اداروں کو ہنگامی صورت حال سے نمٹنے کے لیے تیار رہنے کی ہدایات جاری کر دی ہیں۔ عوام کو بھی مشورہ دیا گیا ہے کہ وہ موسمی ایڈوائزری پر عمل کریں اور کسی بھی ایمرجنسی کی صورت میں مقامی حکام سے رابطہ کریں۔
