حکومت پاکستان نے ملک میں مقیم تمام افغان شہریوں کے انخلا کے لیے 1 ستمبر 2025 کی حتمی تاریخ مقرر کر دی ہے۔ اس فیصلے کے تحت نہ صرف غیر قانونی طور پر مقیم افغان باشندے، بلکہ وہ افراد بھی وطن واپسی کے پابند ہوں گے جن کے پاس پی او آر (پروف آف رجسٹریشن) یا افغان سٹیزن کارڈ موجود ہیں۔ انخلا کی اس مہم کے مکمل ہونے میں اب صرف1 دن باقی رہ گئے ہیں۔
سرکاری حکام کے مطابق یہ اقدام ملک میں غیر قانونی تارکین وطن کی بڑھتی ہوئی تعداد پر قابو پانے اور قانونی طور پر مقیم افراد کی مؤثر رجسٹریشن کو یقینی بنانے کے لیے اٹھایا گیا ہے۔
حکام نے واضح کیا ہے کہ پاکستان میں غیر قانونی طور پر مقیم تمام افغان شہریوں، حتیٰ کہ عارضی دستاویزات رکھنے والوں کو بھی، رضاکارانہ بنیادوں پر ملک چھوڑنا ہوگا۔ حکومت نے یقین دہانی کرائی ہے کہ انخلا کے عمل میں زبردستی، بدسلوکی یا غیر انسانی سلوک سے گریز کیا جائے گا۔
واپسی کے عمل کو باعزت، محفوظ اور منظم بنانے کے لیے حکومت کی جانب سے افغان باشندوں کے لیے خوراک، طبی امداد اور دیگر بنیادی سہولیات کا مکمل بندوبست کر دیا گیا ہے۔
حکام نے افغان شہریوں سے اپیل کی ہے کہ وہ مقررہ مدت کے اندر اپنے واپسی کے انتظامات مکمل کریں تاکہ کسی بھی ممکنہ ناخوشگوار صورتحال سے بچا جا سکے۔
یہ فیصلہ ایک ایسے وقت میں سامنے آیا ہے جب ملک کو سکیورٹی خدشات، وسائل پر دباؤ اور سماجی مسائل جیسے چیلنجز کا سامنا ہے۔ حکام کا کہنا ہے کہ اس اقدام سے نہ صرف ملکی سلامتی کو بہتر بنانے میں مدد ملے گی بلکہ رجسٹریشن اور نگرانی کا نظام بھی زیادہ مؤثر بنایا جا سکے گا۔
