پاکستان اور افغانستان کے درمیان جاری کشیدگی کے خاتمے کے لیے دوحا میں ہونے والے اعلیٰ سطحی مذاکرات کامیاب ہو گئے۔ اس اہم پیشرفت کے بعد دونوں ممالک نے فوری جنگ بندی اور ایک دوسرے کی سرزمین کے احترام پر باقاعدہ اتفاق کر لیا ہے۔
معاہدے کے تحت افغانستان کی جانب سے پاکستان میں دہشت گردی کا سلسلہ فی الفور بند کیا جائے گا، جسے خطے میں امن و استحکام کی جانب ایک اہم قدم قرار دیا جا رہا ہے۔
قطری وزارتِ خارجہ نے مذاکرات کی کامیابی کی باضابطہ تصدیق کرتے ہوئے کہا ہے کہ یہ معاہدہ قطر اور ترکیہ کی مشترکہ ثالثی کے نتیجے میں طے پایا۔ مذاکرات کا پہلا دور گزشتہ روز دوحا میں قطری انٹیلی جنس چیف عبداللہ بن محمد الخلیفہ کی میزبانی میں منعقد ہوا، جو تیرہ گھنٹے تک جاری رہا۔
پاکستانی وفد کی قیادت وزیرِ دفاع خواجہ آصف نے کی، جن کے ہمراہ اعلیٰ سیکیورٹی حکام بھی شریک تھے۔ افغان وفد کی سربراہی افغان وزیر دفاع ملا محمد یعقوب نے کی، جن کے ہمراہ افغان انٹیلی جنس کے سربراہ بھی موجود تھے۔
مذاکرات کے دوران دونوں فریقین نے اپنے تحفظات، خدشات اور مستقبل میں دو طرفہ تعاون کے امکانات پر تفصیلی گفتگو کی۔ اس موقع پر خطے میں دیرپا امن کے لیے ایک مستقل مکینزم بنانے پر بھی اتفاق ہوا ہے۔
وزیرِ دفاع خواجہ آصف نے مذاکرات کی کامیابی پر خوشی کا اظہار کرتے ہوئے اپنے بیان میں کہا’’الحمدللہ، پاکستان اور افغانستان کے درمیان سیز فائر کا معاہدہ طے پا گیا ہے۔ اس کے تحت افغانستان سے پاکستان میں دہشت گردی کا سلسلہ فوری بند ہوگا اور دونوں ممالک ایک دوسرے کی سرزمین کا احترام کریں گے۔‘‘
انہوں نے مزید بتایا کہ دونوں ممالک کے وفود کی اگلی ملاقات 25 اکتوبر کو استنبول میں ہوگی، جس میں آئندہ کا لائحہ عمل اور پائیدار امن کے لیے اقدامات زیرِ غور آئیں گے۔خواجہ آصف نے قطر اور ترکیہ کے کردار کو سراہتے ہوئے کہا کہ ان برادر ممالک کی مخلصانہ ثالثی کے بغیر یہ پیش رفت ممکن نہ تھی۔
دوسری جانب، سفارتی ذرائع کا کہنا ہے کہ بھارت کی جانب سے مذاکراتی عمل کو ناکام بنانے کی تمام کوششیں ناکام ہو گئیں، اور دوحا مذاکرات کی کامیابی کو پاکستان کی سفارتی فتح قرار دیا جا رہا ہے۔
قطری وزارت خارجہ نے بھی امید ظاہر کی ہے کہ یہ جنگ بندی پاکستان اور افغانستان کے درمیان سرحدی کشیدگی کے خاتمے اور خطے میں پائیدار امن کے قیام کی بنیاد بنے گی۔
