اسلام آباد: ستائیس ویں آئینی ترمیم کے معاملے پر بات چیت کے لیے ایم کیو ایم کا وفد مولانا فضل الرحمان کی رہائشگاہ پہنچا، جہاں وفد اور جے یو آئی رہنماؤں کے درمیان اہم اجلاس ہوا۔
ایم کیو ایم کے وفد میں گورنر سندھ کامران خان ٹیسوری، خالد مقبول صدیقی، مصطفیٰ کمال، فاروق ستار، خواجہ اظہار الحسن، ارشد وہرہ اور دیگر شامل تھے۔
ملاقات کے بعد میڈیا سے گفتگو کرتے ہوئے مصطفیٰ کمال نے کہا کہ ایم کیو ایم کا وفد خالد مقبول کی سربراہی میں مولانا فضل الرحمان کے پاس آیا اور آئینی ترمیم کا مسودہ پیش کیا۔
انہوں نے بتایا کہ وفاق اور صوبوں کے نظام میں عوام تک سہولیات پہنچانے کے طریقے مؤثر نہیں، اور اٹھارہویں ترمیم کے بعد صوبوں کو وسائل میں زیادہ حصہ ملا ہے۔
مصطفیٰ کمال نے مزید کہا کہ یہ مسودہ چھبیس ویں آئینی ترمیم میں بھی پیش کیا گیا تھا مگر منظور نہیں ہو سکا، تاہم وزیر اعظم نے ستائیس ویں آئینی ترمیم کے مسودے کی حمایت کا عندیہ دیا ہے۔
یہ بھی پڑھیں : پشاور اچینی چوک میں ورکشاپ میں اچانک آگ بھڑک اٹھی، ریسکیو نے آگ پر قابو پالیا
انہوں نے کہا کہ یہ مسودہ جے یو آئی کو دیا گیا ہے اور یہ پاکستان کا مسودہ ہے۔
مصطفیٰ کمال نے زور دیا کہ اختیارات اور وسائل عوام تک پہنچانے کا واحد حل ایم کیو ایم کی آئینی ترمیم ہے اور تمام جماعتیں اس ترمیم کو سپورٹ کریں۔
