اسلام آباد : چیئرمین پیپلز پارٹی بلاول بھٹو زرداری نے کہا ہے کہ خیبرپختونخوا میں گورنر راج لگانا نہ تو ان کا اور نہ ہی ان کی پارٹی کا مطالبہ ہے۔
میڈیا سے گفتگو کرتے ہوئے انہوں نے واضح کیا کہ وہ کسی سیاسی جماعت پر پابندی کے حق میں بھی نہیں اور صوبے میں سیاسی جماعتوں کو اپنا رویہ بہتر کرنا ہوگا۔
بلاول بھٹو نے کہا کہ خیبرپختونخوا میں دہشت گردوں کے خلاف جاری آپریشن میں رکاوٹیں ڈالنے والے یا دہشت گردوں کے سہولت کار بننے والے سیاسی جماعتوں کی وجہ سے مسائل پیدا ہوں گے۔
ایسے حالات میں گورنر راج لگانے کا امکان بڑھ سکتا ہے۔ انہوں نے مزید کہا کہ اگر صوبائی حکومت فوجی انخلا کی کوشش کرتی ہے تو گورنر راج ایک مجبوری بن جائے گا۔
ان کے مطابق خیبرپختونخوا میں امن و امان کی صورتحال خطرناک حد تک بگڑ رہی ہے اور پی ٹی آئی کے رویے کی وجہ سے گورنر راج کی ضرورت پیدا ہو سکتی ہے۔
چیئرمین پیپلز پارٹی نے سندھ میں سیاسی ماحول کے بارے میں بھی بات کی اور کہا کہ اگر مریم نواز سندھ سے انتخابات میں حصہ لیں تو انہیں خوش آمدید کہیں گے۔
یہ بھی پڑھیں : گورنر راج نافذ کرنے کے امکانات بڑھ گئے، اختیار ولی نے صورتحال واضح کر دی
انہوں نے زور دیا کہ سندھ میں تمام سیاسی جماعتوں کو انتخابات میں حصہ لینا چاہیے۔ بلاول بھٹو نے کہا کہ وہ ایک آزاد رہنما ہیں اور حکومت کی تعریف یا تنقید اپنے مینڈیٹ کے مطابق کرتے ہیں۔
بلاول بھٹو نے پنجاب کے عوام کے حوالے سے بھی گفتگو کی اور کہا کہ انہیں وہاں محبت اور اعتماد ملتا ہے۔ انہوں نے حکومت پر زور دیا کہ وہ اپوزیشن کو سیاست میں مناسب جگہ دے اور انتخابات کے عمل میں سب فریقوں کا اعتماد قائم کرے۔
ان کے مطابق سیاسی جماعتوں کو آئندہ انتخابات سے پہلے اپنے رویے اور حکمت عملی پر کام کرنا چاہیے تاکہ ملک میں سیاسی استحکام اور جمہوری عمل کو فروغ دیا جا سکے۔
