لاہور: سابق وزیراعظم اور مسلم لیگ (ن) کے قائد نواز شریف نے تمام سیاسی جماعتوں کا یک زبان ہونا خوش آئند قرار دیتے ہوئے کہا ہے کہ یہ ملکی مفاد میں ہے۔
جمعہ کے روز نواز شریف سے سینیٹر عرفان صدیقی نے ملاقات کی اور ایوان بالا میں پارلیمانی پارٹی کی کارکردگی سے آگاہ کیا۔ ملاقات کے دوران سینیٹر عرفان صدیقی نے ملکی دفاع کے عزم کے متفقہ اظہار پر مشتمل قرارداد کا بھی ذکر کیا۔
نواز شریف نے ملاقات کے دوران کہا کہ قومی اتحاد و یکجہتی کے لیے پارلیمنٹ کا کردار قابل تحسین ہے۔ ان کا کہنا تھا کہ اختلاف رائے جمہوریت کا حسن ہے، لیکن ملکی دفاع کے حوالے سے ہر طرح کے اختلافات کو ایک طرف رکھ دینا ایک اچھی روایت ہے۔
سابق وزیراعظم نے مزید کہا کہ تمام سیاسی جماعتوں کا یک زبان ہونا نہ صرف ملکی سیاست کی پختگی کی علامت ہے بلکہ یہ ملک کے دفاع اور استحکام کے لیے بھی ضروری ہے۔ ان کا ماننا تھا کہ اس قسم کی یکجہتی اور ہم آہنگی جمہوری عمل کو مزید مستحکم کرتی ہے۔
یہ بھی پڑھیں : بھارت کا جھوٹ عالمی سطح پر بے نقاب ہو چکا ہے، سینیٹر عرفان صدیقی
اس موقع پر سینیٹر عرفان صدیقی نے نواز شریف کو ایوان بالا میں پارلیمانی پارٹی کی کارکردگی کے بارے میں تفصیلات فراہم کیں اور قرارداد کی منظوری کے بارے میں آگاہ کیا۔
