وزیراعلیٰ خیبرپختونخوا علی امین گنڈاپور نے موجودہ حکومت کو کھلا چیلنج دیتے ہوئے کہا ہے کہ اگر ہمت ہے تو سیاسی اور جمہوری طریقے سے حکومت گرا کر دکھاؤ۔ ان کا کہنا تھا کہ وہ عمران خان کے ساتھ کھڑے ہیں اور رہیں گے۔
نجی ٹی وی چینل (دنیا نیوز )کے مطابق ڈسٹرکٹ کورٹس اسلام آباد میں پیشی کے موقع پر میڈیا سے گفتگو کرتے ہوئے علی امین گنڈاپور نے دعویٰ کیا کہ 5 اگست کو ملک بھر سے عوام احتجاج کے لیے نکلیں گے اور بانی پی ٹی آئی عمران خان کی جلد رہائی ممکن ہو گی۔
جھوٹے مقدمات کا سامنا کر رہے ہیں، لیکن پیچھے نہیں ہٹیں گے
وزیراعلیٰ کے پی نے کہا کہ ان پر جھوٹے اور من گھڑت الزامات لگائے گئے ہیں، لیکن وہ ہمیشہ قانون کا احترام کرتے ہوئے عدالتوں میں پیش ہوئے ہیں۔
’’میرے خلاف جو کیس بنایا گیا ہے، اس میں نہ میں موقع پر موجود تھا، نہ ہی وہ گاڑی میری تھی، صرف اسلحہ اور بوتلیں ڈال کر کیس بنایا گیا۔‘‘
انہوں نے مزید کہا کہ یہ حق اور سچ کی جنگ ہے، جسے وہ خود لیڈ کر رہے ہیں اور اسے جیت کر دکھائیں گے۔
عدالت میں پیشی، وارنٹ منسوخ
دوسری جانب اسلام آباد کی ڈسٹرکٹ اینڈ سیشن کورٹ میں شراب اور اسلحہ برآمدگی کیس کی سماعت ہوئی، جہاں علی امین گنڈاپور نے خود کو عدالت کے سامنے رضاکارانہ طور پر پیش کیا۔
جوڈیشل مجسٹریٹ مبشر حسن چشتی نے کیس پر سماعت کرتے ہوئے ان کے وارنٹ گرفتاری منسوخ کر دیے اور ضمانتی پر جاری شوکاز نوٹس بھی واپس لے لیا۔
پس منظر
یاد رہے کہ علی امین گنڈاپور کے خلاف تھانہ بارہ کہو میں مقدمہ درج ہے، جس میں ان پر اسلحہ اور شراب رکھنے کا الزام ہے۔ وزیراعلیٰ نے کہا ہے کہ وہ ان تمام مقدمات کا قانونی انداز میں سامنا کریں گے اور پیچھے ہٹنے والے نہیں۔
