خیبرپختونخوا حکومت نے سرکاری ملازمین کو اقساط پر رہائش فراہم کرنے کے لیے ایک انقلابی منصوبے کا آغاز کر دیا ہے۔
اس مقصد کے تحت صوبائی اسمبلی نے “گورنمنٹ سرونٹس ہاؤسنگ فاؤنڈیشن بل” باقاعدہ طور پر منظور کر لیا ہے، جو کہ ملازمین کی رہائشی ضروریات کو پورا کرنے کی جانب ایک بڑا قدم قرار دیا جا رہا ہے۔
حکام کے مطابق اس اسکیم کا بنیادی مقصد یہ ہے کہ سرکاری ملازمین کو ان کی ملازمت کے دوران اور ریٹائرمنٹ کے بعد معیاری اور پُرامن رہائش میسر ہو۔ کم آمدنی کے باعث اکثر ملازمین ذاتی گھر بنانے سے محروم رہ جاتے ہیں، جس کے پیش نظر یہ منصوبہ ایک بڑی سہولت فراہم کرے گا۔
اس بل کے تحت سرکاری ملازمین کی ماہانہ تنخواہوں سے معمولی رقم بطور قسط منہا کی جائے گی، جو ہاؤسنگ فاؤنڈیشن کے فنڈ میں جمع ہوگی۔ انہی فنڈز سے کم لاگت کے ہاؤسنگ منصوبے تیار کیے جائیں گے، جہاں ملازمین کو ان کی مالی سکت کے مطابق گھر یا پلاٹ فراہم کیا جائے گا۔
منصوبے میں جدید ہاؤسنگ سوسائٹیوں کے ماڈلز کو مدنظر رکھتے ہوئے ڈیزائن اور معیار پر خصوصی توجہ دی جائے گی۔ یہ سہولت صرف پشاور ہی نہیں بلکہ صوبے کے دیگر اضلاع میں بھی فراہم کی جائے گی تاکہ دور دراز علاقوں کے ملازمین بھی فائدہ اٹھا سکیں۔
حکومت کا کہنا ہے کہ اقساط کو اس انداز میں ترتیب دیا جائے گا کہ کسی ملازم پر اضافی مالی بوجھ نہ پڑے، اور تمام عمل شفاف اور آسان ہو۔ عنقریب اس اسکیم کے قواعد و ضوابط کا اعلان کیا جائے گا، جس کے بعد اس پر باقاعدہ عملدرآمد شروع کر دیا جائے گا۔
