ڈسٹرکٹ پولیس آفیسر صوابی ضیاء الدین احمد کے مطابق تھانہ گبر کے ایس ایچ او عبدالعلی عرف گبر کو واٹس ایپ پر متنازع تصویر لگانے کے باعث عہدے سے ہٹایا گیا۔
ان کا کہنا تھا کہ ایس ایچ او کے واٹس ایپ اکاؤنٹ پر موجود تصویر شدت پسندانہ اور دہشت گرد ذہنیت کی عکاسی کرتی تھی، جو پولیس ضابطۂ اخلاق اور قانون کے منافی ہے۔
ڈی پی او ضیاء الدین احمد نے مزید بتایا کہ آر پی او مردان کی ہدایت پر ایس ایچ او کے خلاف کارروائی کا حکم دیا گیا۔
یہ بھی پڑھیں : وزیراعلی سہیل آفریدی کو لاجواب کرنے والی طالبہ نے مزید سوالات اٹھالئے
ان کے مطابق ایس ایچ او کو متعدد بار متنازع تصویر ہٹانے کے لیے آگاہ کیا گیا تاہم بار بار تنبیہ کے باوجود وہ قانون کی خلاف ورزی کرتا رہا، جس کے بعد محکمانہ کارروائی عمل میں لائی گئی۔
ڈی پی او صوابی کا کہنا تھا کہ پولیس فورس میں کسی بھی قسم کی شدت پسندی یا قانون شکنی کو ہرگز برداشت نہیں کیا جائے گا اور ایسے عناصر کے خلاف بلاامتیاز کارروائی جاری رہے گی۔
