پشاور: وزیر اعلیٰ خیبرپختونخوا علی امین گنڈاپور نے کہا ہے کہ اگر ملک میں پہلے سے ڈیمز بنائے گئے ہوتے تو آج جو سیلابی پانی زحمت کا باعث بنا ہوا ہے، وہ نعمت بن جاتا۔
انہوں نے صوبے کے وسائل سے خود ڈیمز بنانے کا اعلان کیا تاکہ مستقبل میں پانی کو محفوظ کیا جا سکے۔
علی امین گنڈاپور نے کہا کہ سیلاب متاثرین پر جو پیسہ خرچ کیا گیا، اس سے کئی ڈیمز بنائے جا سکتے تھے، اور اب صوبائی حکومت ان منصوبوں پر بھرپور کام کرے گی تاکہ قدرتی آفات کے نقصانات کو کم کیا جا سکے۔
وزیر اعلیٰ نے اپنے ویڈیو پیغام میں بتایا کہ 15 اگست سے شروع ہونے والے کلاؤڈ برسٹ اور سیلابی بارشوں نے بونیر، سوات، شانگلہ، باجوڑ، مانسہرہ اور صوابی سمیت کئی اضلاع کو بری طرح متاثر کیا ہے۔
ان بارشوں اور حادثات میں 406 افراد جاں بحق، 245 زخمی اور ہزاروں مکانات اور بنیادی ڈھانچے کو شدید نقصان پہنچا ہے۔
انہوں نے کہا کہ صوبائی حکومت نے فوری طور پر ریسکیو اور ریلیف سرگرمیاں شروع کر دی ہیں، جن کے تحت 1 لاکھ 19 ہزار افراد کو گرم کھانا فراہم کیا گیا، 125 ٹرکوں پر امدادی سامان پہنچایا گیا اور 70 میڈیکل کیمپس قائم کیے گئے ہیں۔ معاوضوں میں بھی نمایاں اضافہ کیا گیا ہے تاکہ متاثرین کو مناسب مدد فراہم کی جا سکے۔
یہ بھی پڑھیں : یاماہا وائی بی آر خریدنے کے خواہشمند افراد کیلئے بڑی خوشخبری
علی امین گنڈاپور نے اعلان کیا کہ کابینہ اراکین، اراکین اسمبلی اور سرکاری ملازمین اپنی تنخواہیں سیلاب متاثرین کے لیے عطیہ کریں گے، جس کے لیے پی ڈی ایم اے میں خصوصی اکاؤنٹ کھولا گیا ہے۔ اب تک صوبائی حکومت نے 6.5 ارب روپے ریلیف اور بحالی کے لیے جاری کیے ہیں اور مزید 5 ارب روپے بھی جاری کیے جائیں گے۔
وزیراعلیٰ نے کہا کہ وہ اور چیف سیکرٹری خود متاثرہ علاقوں میں امدادی کاموں کی نگرانی کر رہے ہیں اور سیلاب متاثرین کی مکمل بحالی تک کام جاری رکھیں گے۔ جن کے گھر تباہ ہوئے ہیں، انہیں نئے گھر بنا کر دیے جائیں گے اور نقصانات کا سو فیصد ازالہ کیا جائے گا۔
انہوں نے مزید بتایا کہ آئندہ ایسے حادثات سے بچاؤ کے لیے کچھ آبادیوں کو محفوظ مقامات پر منتقل کیا جائے گا، اور جن بچوں کے والدین اس آفت میں جاں بحق ہوئے ہیں، ان کی کفالت کی ذمہ داری صوبائی حکومت اٹھائے گی۔
وزیر اعلیٰ نے کہا کہ خیبرپختونخوا حکومت پنجاب کے سیلاب متاثرین کے ساتھ یکجہتی کے جذبے سے کھڑی ہے اور ہر ممکن تعاون فراہم کرے گی۔
