ریاست مخالف ٹویٹ کے الزام سمیت دو مقدمات میں گرفتار صنم کی بہن فلک جاوید کا چار روزہ جسمانی ریمانڈ عدالت نے منظور کر لیا ہے۔
ضلع کچہری لاہور میں جوڈیشل مجسٹریٹ نعیم وٹو نے گزشتہ سماعت کا تحریری فیصلہ جاری کیا ہے، جس میں بتایا گیا کہ این سی سی آئی اے کے تفتیشی افسر نے فلک جاوید کا 21 روزہ جسمانی ریمانڈ مانگا تھا لیکن عدالت نے چار روزہ ریمانڈ دیا ہے۔
تحریری فیصلے کے مطابق تفتیشی افسر نے ملزمہ کا موبائل فون ریکور کر لیا ہے، تاہم فلک جاوید موبائل فون کا پاسورڈ فراہم کرنے سے انکار کر رہی ہے۔ اس وجہ سے عدالت نے تفتیشی افسر کی درخواست پر چار روزہ جسمانی ریمانڈ منظور کیا۔
عدالت نے حکم دیا ہے کہ ملزمہ کو 8 اکتوبر کو دوبارہ عدالت میں پیش کیا جائے گا، اور اگر مزید ریمانڈ کی ضرورت ہوئی تو تفتیشی افسر کی رپورٹ کی بنیاد پر فیصلہ کیا جائے گا۔
فیصلے میں مزید کہا گیا ہے کہ اگر تفتیشی افسر ملزمہ سے مزید میٹریل کی بازیابی کی رپورٹ پیش نہ کر سکے تو مزید ریمانڈ نہیں دیا جائے گا، اور تفتیشی افسر کو جیل جا کر ملزمہ سے تفتیش کرنے کا حکم بھی دیا گیا ہے۔
