مہنگائی سے پریشان عوام کے لیے ایک خوشخبری ہے، کیونکہ پیٹرولیم مصنوعات کی قیمتوں میں 16 اکتوبر سے نمایاں کمی کا امکان ظاہر کیا جا رہا ہے۔ پیٹرولیم سیکٹر سے وابستہ ذرائع کے مطابق، پیٹرول کی فی لیٹر قیمت میں 6 روپے 10 پیسے تک کمی متوقع ہے۔
ذرائع کا کہنا ہے کہ عالمی منڈی میں خام تیل کی قیمتوں میں کمی کے اثرات اب پاکستان میں بھی نظر آ رہے ہیں، جس کے نتیجے میں پیٹرولیم مصنوعات کی قیمتیں کم کرنے کی تجویز زیر غور ہے۔
اوگرا (آئل اینڈ گیس ریگولیٹری اتھارٹی) کو جمع کرائے گئے اعداد و شمار کے مطابق، ہائی اسپیڈ ڈیزل کی قیمت میں بھی 97 پیسے فی لیٹر تک کمی کی توقع کی جا رہی ہے۔
اگرچہ مجوزہ کمی محدود ہے، لیکن یہ فیصلہ مہنگائی کے ستائے ہوئے عوام کے لیے معمولی مگر اہم ریلیف ثابت ہو سکتا ہے۔ پیٹرول اور ڈیزل کی قیمتوں میں کمی سے نہ صرف ٹرانسپورٹ کے کرایوں پر اثر پڑے گا بلکہ اشیائے خوردونوش کی قیمتوں میں بھی کسی حد تک بہتری کی امید ہے۔
حکومت کی جانب سے پیٹرولیم مصنوعات کی قیمتوں میں رد و بدل کا حتمی اعلان 15 اکتوبر کی شب متوقع ہے، جو نئی قیمتوں کا اطلاق 16 اکتوبر سے کرے گا۔
