محکمہ موسمیات نے آئندہ 24 گھنٹوں کے دوران ملک کے بیشتر علاقوں میں موسم کے حوالے سے اہم پیشگوئی جاری کرتے ہوئے کہا ہے کہ ملک بھر میں موسم خشک جبکہ پہاڑی علاقوں میں سرد رہنے کا امکان ہے۔
ترجمان محکمہ موسمیات کے مطابق اسلام آباد اور گرد و نواح میں موسم مکمل طور پر خشک رہے گا، جبکہ پہاڑی علاقوں میں رات اور صبح کے اوقات میں سردی کی شدت میں اضافہ متوقع ہے
بلوچستان کے بیشتر اضلاع میں موسم سرد اور خشک رہنے کی توقع ہے، خاص طور پر کوئٹہ، زیارت، قلات اور گرد و نواح میں درجہ حرارت میں مزید کمی کا امکان ہے۔
پنجاب کے میدانی علاقوں میں دن کے وقت موسم خشک جبکہ رات کے اوقات میں ہلکی خنکی کا احساس برقرار رہے گا۔
سندھ کے جنوبی اور وسطی اضلاع میں موسم گرم اور خشک رہنے کا امکان ہے، کراچی، حیدرآباد، سکھر اور جیکب آباد میں درجہ حرارت بلند رہنے کی پیشگوئی ہے۔
خیبرپختونخوا کے شمالی اور بلند علاقوں میں موسم سرد اور خشک رہے گا، جبکہ جنوبی اضلاع میں موسم نسبتاً معتدل رہے گا۔
گلگت بلتستان اور آزاد کشمیر میں بھی موسم سرد اور خشک رہنے کا امکان ہے، خاص طور پر اسکردو، ہنزہ، مظفرآباد اور راولا کوٹ کے علاقوں میں صبح اور رات کے اوقات میں درجہ حرارت کم رہے گا۔
محکمہ موسمیات کے مطابق گزشتہ 24 گھنٹوں کے دوران بھی ملک کے بیشتر علاقوں میں موسم خشک جبکہ شمالی پہاڑی علاقوں میں سردی کی شدت محسوس کی گئی۔
محکمہ موسمیات نے شہریوں کو مشورہ دیا ہے کہ صبح اور رات کے اوقات میں گرم لباس کا استعمال کریں اور پہاڑی علاقوں میں سفر کرنے والے مسافر اپنی تیاری مکمل رکھیں، تاکہ موسم کی شدت سے بچا جا سکے۔
