ملک کے بالائی علاقوں میں ژالہ باری اور بارش کے بعد سردی کی شدت میں نمایاں اضافہ ہو گیا ہے، جبکہ محکمہ موسمیات نے مزید بارش اور پہاڑوں پر برفباری کی پیشگوئی کر دی ہے۔
محکمہ موسمیات کے مطابق، گلگت بلتستان میں بارش اور بلند پہاڑی علاقوں میں برفباری کا امکان ہے جبکہ آزاد کشمیر میں مطلع جزوی طور پر ابر آلود رہنے کی توقع ہے۔
ادارے کے مطابق، اسلام آباد، مری، گلیات، خیبر پختونخوا اور بلوچستان کے بیشتر اضلاع میں موسم سرد اور خشک رہنے کا امکان ہے۔ دوسری جانب سندھ کے بیشتر اضلاع میں موسم گرم اور خشک رہنے کی پیشگوئی کی گئی ہے۔
گزشتہ روز اسلام آباد، لوئر دیر، کالام، مالم جبہ، بالاکوٹ، ایبٹ آباد اور مظفرآباد میں بارش اور ژالہ باری کے باعث سردی میں اضافہ دیکھا گیا۔ محکمہ موسمیات کے مطابق، بالائی علاقوں میں درجہ حرارت میں نمایاں کمی ریکارڈ کی گئی ہے۔
آج ریکارڈ کیے گئے کم سے کم درجہ حرارت کے مطابق، لہہ میں منفی 3، اسکردو میں منفی 1 اور بابوسر میں 1 ڈگری سینٹی گریڈ ریکارڈ کیا گیا ہے۔
محکمہ موسمیات کا کہنا ہے کہ آئندہ 24 گھنٹوں کے دوران ملک کے بالائی علاقوں میں مزید بارش اور برفباری متوقع ہے، جس کے باعث سردی کی شدت میں مزید اضافہ ہو سکتا ہے۔
