اسلام آباد: سیشن کورٹ نے پی ٹی آئی رہنما اعظم سواتی کو متنازعہ ٹویٹس کے 2 مقدمات سے بری کر دیا۔
ایڈیشنل ڈسٹرکٹ اینڈ سیشن جج افضل مجوکہ نے بریت کی درخواستوں پر فیصلہ سنایا۔
اعظم سواتی کے خلاف ایف آئی اے نے متنازعہ ٹویٹس پر دو مقدمات درج کر رکھے تھے۔
واضح رہے کہ گزشتہ روز پشاور ہائیکورٹ نے نیب نوٹس کے خلاف دائر درخواست پر اعظم سواتی کو دس دن تک درج مقدمات میں گرفتار نہ کرنے کا حکم دیا تھا۔
عدالت نے کہا کہ درخواست گزار احتساب عدالت میں پیش ہونا چاہتا ہے، اور درخواست گزار سے قانون کے مطابق سلوک کیا جائے۔
یہ بھی پڑھیں : سپریم کورٹ آئینی بنچ میں عمر ایوب اور شبلی فراز نے نااہلی سے متعلق اپیلیں واپس لے لیں
تفصیلات کے مطابق سپریم کورٹ کے آئینی بنچ میں عمر ایوب اور شبلی فراز کی نااہلی سے متعلق اپیلوں پر سماعت ہوئی۔
جج امین الدین کی سربراہی میں 5 رکنی آئینی بنچ نے کیس کی سماعت کی، جبکہ عمر ایوب اور شبلی فراز کی جانب سے بیرسٹر گوہر عدالت میں پیش ہوئے۔
عمر ایوب نے سپیکر اور الیکشن کمیشن کے نوٹیفکیشنز کو چیلنج کیا تھا، تاہم ان کی جانب سے درخواستیں واپس لے لی گئیں۔ اسی طرح شبلی فراز نے چیئرمین سینیٹ کے نوٹیفکیشن کے خلاف اپیل واپس لے لی۔
عدالت نے شبلی فراز کی الیکشن کمیشن کے نوٹیفکیشن کے خلاف اپیل پر نوٹسز جاری کر دیے اور کیس کی سماعت 29 اکتوبر تک ملتوی کر دی گئی۔
بیرسٹر گوہر نے عدالت میں بتایا کہ عمر ایوب کی نشست پر ان کی اہلیہ الیکشن لڑیں گی۔
انہوں نے مزید کہا کہ قائد حزب اختلاف کی ڈی نوٹیفکیشن کے خلاف اپیل بھی واپس لے لی گئی ہے اور محمود خان اچکزئی کو اپوزیشن لیڈر مقرر کرنے کا نوٹیفکیشن جاری ہو چکا ہے۔
