جعلی پاکستانی شناختی کارڈز کے ذریعے سعودی ورک ویزا حاصل کرنے کی کوشش ناکام، وفاقی تحقیقاتی ایجنسی نے 5 افغان شہریوں کو گرفتار کرلیا۔
تفصیلات کے مطابق پشاور میں وفاقی تحقیقاتی ایجنسی (ایف آئی اے) نے غیر قانونی شناختی دستاویزات کے ذریعے سعودی عرب کا ویزا حاصل کرنے کی کوشش کرنے والے پانچ افغان شہریوں کو گرفتار کر لیا۔ یہ کارروائی اسمگلنگ سرکل نے شہر کے دبگڑی میں واقع ایک نجی ہوٹل پر کی۔
ایف آئی اے کے ترجمان کے مطابق گرفتار ملزمان علی خان، اجمل، قاسم، احمد اور حمزہ ہیں، جو غیر قانونی طور پر پاکستان میں مقیم تھے۔ ابتدائی تفتیش میں یہ بات سامنے آئی ہے کہ ملزمان نے جعلی طریقے سے پاکستانی شناختی کارڈ اور پاسپورٹ حاصل کیا تھا۔
ملزمان نے ایف آئی اے کو بتایا کہ ان کا مقصد جعلی پاکستانی دستاویزات کے ذریعے سعودی عرب کا ورک ویزا حاصل کرنا تھا۔ کارروائی کے دوران ملزمان کے قبضے سے افغان دستاویزات اور جعلی پاکستانی شناختی کارڈز بھی برآمد کیے گئے۔
ایف آئی اے نے ملزمان کے خلاف مقدمہ درج کر کے تفتیش شروع کر دی ہے، اور کہا گیا ہے کہ اس طرح کی کارروائیاں ملک میں غیر قانونی رہائش اور دستاویزات کی جعلسازی کے خلاف سخت پیغام ہیں۔
یہ کارروائی ایسے وقت میں سامنے آئی ہے جب ملک میں شناختی دستاویزات کی حفاظت اور غیر قانونی ویزا حصول کے حوالے سے سخت نگرانی جاری ہے۔
