نگران حکومت کی ذمہ داریاں سنبھال لی گئیں، جسٹس (ر) یار محمد ناصر کا شفاف انتخابات کا اعلان
تفصیلات کے مطابق گلگت بلتستان کے نئے نگران وزیر اعلیٰ جسٹس (ر) یار محمد ناصر نے اپنے عہدے کا باضابطہ حلف اٹھا لیا۔ گورنر گلگت بلتستان سید مہدی شاہ نے گورنر ہاؤس میں منعقدہ تقریب کے دوران ان سے حلف لیا۔
حلف برداری کی تقریب میں وفاقی وزیر امور کشمیر و گلگت بلتستان امیر مقام، چیف جسٹس سپریم اپیلیٹ کورٹ رانا شمیم، سابق وزیر اعلیٰ حاجی گلبر خان، ارکان اسمبلی، اعلیٰ حکومتی حکام اور دیگر معزز مہمانوں نے شرکت کی۔ تقریب میں سیاسی و انتظامی قیادت کی بڑی تعداد کی موجودگی کو اہم سیاسی پیش رفت قرار دیا جا رہا ہے۔
نگران وزیر اعلیٰ یار محمد ناصر نے حلف اٹھانے کے بعد میڈیا سے گفتگو کرتے ہوئے کہا کہ وہ گلگت بلتستان میں شفاف، منصفانہ اور بروقت انتخابات کرانے کے لیے پرعزم ہیں۔ انہوں نے اعلان کیا کہ اگلے دو ماہ کے اندر صوبے میں عام انتخابات کرائے جائیں گے تاکہ عوامی مینڈیٹ کی بنیاد پر منتخب حکومت ذمہ داریاں سنبھال سکے۔
یاد رہے کہ سابق وزیر اعلیٰ گلگت بلتستان حاجی گلبر خان اور ان کی کابینہ نے 24 نومبر 2025 کو اپنی آئینی مدت مکمل کی، جس کے بعد آئین کے مطابق نگران سیٹ اپ کی تشکیل عمل میں لائی گئی۔
سیاسی مبصرین کے مطابق نگران حکومت کے قیام کے بعد گلگت بلتستان میں انتخابی سرگرمیوں میں تیزی آئے گی، جبکہ نگران وزیر اعلیٰ پر صاف و شفاف انتخابی عمل کو یقینی بنانے کی اہم ذمہ داری عائد ہو گئی ہے۔
