عطا تارڑ کا سخت الزام، پی ٹی آئی کا ملک دشمن عناصر سے گٹھ جوڑ بے نقاب، کے پی حکومت کی کارکردگی صفر قرار
تفصیلات کے مطابق وفاقی وزیر اطلاعات ونشریات عطا تارڑ نے تحریک انصاف اور خیبر پختونخوا حکومت پر شدید تنقید کرتے ہوئے کہا ہے کہ پی ٹی آئی کا ملک دشمن عناصر سے گٹھ جوڑ بے نقاب ہو چکا ہے جبکہ خیبر پختونخوا حکومت کی کارکردگی صفر ہے۔
پریس کانفرنس سے خطاب میں عطا تارڑ نے کہا کہ خیبر پختونخوا میں دہشتگردوں کو گرفتار کیا جاتا ہے لیکن صوبائی حکومت کے پاس ان کے خلاف کیسز لڑنے کی صلاحیت موجود نہیں۔ انہوں نے دعویٰ کیا کہ پورے خیبر پختونخوا میں نان کسٹم پیڈ گاڑیاں کھلے عام گھوم رہی ہیں اور ان گاڑیوں سمیت دیگر غیر قانونی سرگرمیوں سے حاصل ہونے والا پیسہ دہشتگردوں تک پہنچ رہا ہے، جو انتہائی تشویشناک ہے۔
وفاقی وزیر نے کہا کہ افغان حکومت کی کمزوریوں کے باعث سرحدی دراندازی میں اضافہ ہوا ہے، مگر اس کے باوجود خیبر پختونخوا حکومت کی نااہلی سب کے سامنے ہے۔ انہوں نے مزید کہا کہ شہباز شریف ملک میں اصلاحات کر رہے ہیں، لیکن خیبر پختونخوا حکومت مختلف مافیاز کو تحفظ فراہم کر رہی ہے۔
عطا تارڑ نے کہا کہ ملک میں پھیلائی جانے والی افواہیں ایک منظم سازش کا حصہ ہیں جن کا مقصد قومی اداروں کو کمزور کرنا ہے۔ انہوں نے زور دیتے ہوئے کہا کہ وفاق اپنی ذمہ داریاں پوری کر رہا ہے، مگر صوبائی حکومت کے ناکام اقدامات نے صورتحال مزید سنگین بنا دی ہے۔
ان کا کہنا تھا کہ قومی سلامتی کے معاملات پر سیاست نہیں ہونی چاہیے اور دہشتگردی کے خلاف جنگ میں سب کو متحد ہونا ہوگا۔
