بحرین نے رہائشی قواعد میں نرمی کرتے ہوئے گولڈن ویزا پروگرام کے لیے کم از کم سرمایہ کاری کی شرط میں 35 فیصد کمی کر دی ہے۔
بحرین کی وزارت داخلہ کے قومی شہریت، پاسپورٹس اور رہائشی امور کے مطابق، اب ملک میں سرمایہ کاری کی حد 2 لاکھ بحرینی دینار سے کم کر کے 1 لاکھ 30 ہزار دینار کر دی گئی ہے۔
اس کا مطلب ہے کہ وہ افراد جو اس وقت کم از کم 130,000 بحرینی دینار مالیت کی جائیداد کے مالک ہیں، اب اس پروگرام کے لیے اہل ہیں۔
گولڈن ویزا مختلف اقسام کے افراد کے لیے دستیاب ہے، جن میں شامل ہیں:
رئیل اسٹیٹ سرمایہ کار
وہ پیشہ ور افراد جو ماہانہ کم از کم 2,000 بحرینی دینار کماتے ہیں
ریٹائرڈ افراد جو بحرین میں 15 سال کام کر چکے ہیں
غیر مقیم ریٹائرڈ افراد جن کی پنشن 4,000 بحرینی دینار یا اس سے زیادہ ہے
خواہشمند افراد وزارت کے آن لائن پورٹل کے ذریعے درخواست دے سکتے ہیں۔ درخواست کے ساتھ درج ذیل دستاویزات فراہم کرنا ضروری ہیں:
پاسپورٹ
چھ ماہ کی بینک اسٹیٹمنٹس
صحت کی انشورنس
رہائش کے ثبوت
درخواست دینے کی فیس صرف 5 بحرینی دینار ہے، اور گولڈن ویزا کے حامل افراد بحرین میں کہیں بھی کام کر سکتے ہیں۔
یہ بھی پڑھیں : گورنر شپ پر اے این پی کا بیان، ابھی تک کسی نے رابطہ نہیں کیا، ترجمان
یہ اقدام سرمایہ کاروں، پیشہ ور افراد اور ریٹائرڈ افراد کے لیے بحرین میں رہائش کو آسان بنانے اور ملک میں سرمایہ کاری کو فروغ دینے کے لیے کیا گیا ہے۔
