انٹرنیشنل کرکٹ کونسل (آئی سی سی) نے نومبر کے پلیئر آف دی منتھ کے لیے تین کھلاڑیوں کی نامزدگیوں کا اعلان کر دیا ہے-
آئی سی سی کے مطابق پاکستان کے محمد نواز، جنوبی افریقہ کے سائمن ہارمر اور بنگلہ دیش کے تاج الاسلام اس ماہ کی بہترین کارکردگی دکھانے والے کھلاڑیوں کی فہرست میں شامل کیے گئے ہیں۔
پاکستان کے محمد نواز نے نومبر میں شاندار آل راؤنڈ کارکردگی کا مظاہرہ کیا، جس کے باعث انہیں ٹرائی سیریز کا پلیئر آف دی سیریز بھی قرار دیا گیا۔
نواز نے ون ڈے میچز میں 104 رنز اور 4 وکٹیں حاصل کیں جبکہ ٹی ٹوئنٹی فارمیٹ میں 11 وکٹیں اپنے نام کیں، جو ان کی شاندار فارم کا واضح ثبوت ہے۔
جنوبی افریقی اسپنر سائمن ہارمر نے بھارت کے خلاف ٹیسٹ سیریز میں غیر معمولی کارکردگی دکھاتے ہوئے سب کی توجہ حاصل کی۔
انہوں نے صرف 2 ٹیسٹ میچوں میں 17 وکٹیں حاصل کیں اور 8.94 کی اوسط سے اپنی ٹیم کی کامیابیوں میں اہم کردار ادا کیا۔
بنگلہ دیش کے نوجوان فاسٹ بولر تاج الاسلام نے آئرلینڈ کے خلاف ٹیسٹ سیریز میں بہترین بولنگ کا مظاہرہ کیا۔
انہوں نے 2 ٹیسٹ میچوں میں 13 وکٹیں حاصل کر کے خود کو پلیئر آف دی منتھ کے مضبوط امیدواروں میں شامل کر لیا ہے۔
یہ بھی پڑھیں: بنگلادیش پریمیئر لیگ میں پاکستان کے 11 کرکٹرز ایکشن میں ہوں گے
آئی سی سی کی جانب سے ووٹنگ کا عمل جاری ہے اور آنے والے دنوں میں نومبر کے بہترین کھلاڑی کا اعلان کر دیا جائے گا۔
