وزیراعلیٰ خیبرپختونخوا کا پشاور جلسے سے متعلق اہم پیغام جاری، سیاسی ماحول گرم ہونے لگا
تفصیلات کے مطابق وزیراعلیٰ خیبرپختونخوا سہیل آفریدی نے پشاور میں ہونے والے اہم سیاسی جلسے کے حوالے سے خصوصی پیغام جاری کرتے ہوئے کارکنان اور عوام کو بڑے پیمانے پر شرکت کی دعوت دی ہے۔ جاری کردہ پیغام میں انہوں نے بتایا کہ اتوار کو حیات آباد اسپورٹس کمپلیکس میں ایک بڑا جلسہ عام منعقد کیا جا رہا ہے جس میں صوبے بھر سے پارٹی کارکنان کی شرکت متوقع ہے۔
وزیراعلیٰ سہیل آفریدی نے کہا کہ اس جلسے میں تحریک تحفظ آئین پاکستان کی مرکزی قیادت بھی شرکت کرے گی، جبکہ پاکستان تحریک انصاف، آئی ایس ایف، یوتھ ونگ اور تمام ذیلی تنظیموں کو بھرپور شرکت کی ہدایت کی گئی ہے۔ ان کا کہنا تھا کہ یہ جلسہ صوبے کے سیاسی منظرنامے میں اہم موڑ ثابت ہوگا، لہٰذا ہر تنظیم کو اپنے طور پر تیاری اور متحرک کردار ادا کرنا ہوگا
وزیراعلیٰ نے کارکنان سے اپیل کی کہ وہ ویڈیو پیغامات اور سوشل میڈیا کے ذریعے لوگوں کو جلسے میں شرکت کی ترغیب دیں تاکہ عوامی شرکت کو زیادہ سے زیادہ یقینی بنایا جا سکے۔ انہوں نے کہا کہ جلسے کی کامیابی کے لیے ہر کارکن کا کردار نہایت اہم ہے اور سب کو مل کر اپنی ذمہ داری نبھانی ہوگی۔
سیاسی تجزیہ کاروں کے مطابق حیات آباد اسپورٹس کمپلیکس میں ہونے والا یہ جلسہ صوبے کی سیاسی سرگرمیوں کا اہم مرکز بن سکتا ہے اور مستقبل کی حکمت عملی کے حوالے سے بھی اس کی خاص اہمیت ہے۔
